काठमाडौँ । स्पेनमा सम्पन्न संयुक्त राष्ट्रसंघीय सम्मेलनमा असम्बन्धित व्यक्तिलाई पठाएर मानव तस्करी गरेको गिरोहमाथि नेपाल प्रहरीको केन्द्रीय अनुसन्धान ब्युरो(सिआइबी)ले अनुसन्धान थालेको छ। प्रधानमन्त्री केपी शर्मा ओली समेत सहभागी भएको उक्त कार्यक्रममा विभिन्न गैह्र सरकारी संस्थामार्फत असम्बन्धित व्यक्ति त्यहाँ पठाइएको आरोप छ।
सोही विषयमा छानबिन गर्न सिआइबीले प्रहरी वरिष्ठ उपरीक्षक(एसएसपी) होबिन्द्र बोगटीको नेतृत्वमा ६ जनाको छानबिन छानबिन समिति बनाएको छ। समितिमा प्रहरीकै मानव बेचबिखन अनुसन्धान ब्यूरोका प्रहरी उपरीक्षक (एसपी) रुगम कुँवरसमेत सदस्य छन्।
‘यो विषय आयो, त्यसैले यसमा अध्ययन गर्न उहाँहरूलाई जिम्मा दिएका छौँ,’ ब्युरोका प्रमुख प्रहरी अतिरिक्त महानिरीक्षक(एआइजी) चन्द्र कुबेर खापुङले भने, ‘यस्ता कुरा आउँदा ब्युरोको चासो रहने नै भयो।’
स्पेनको सेभियामा संयुक्त राष्ट्रसंघको ‘विकासका लागि वित्त, चौथो अन्तर्राष्ट्रिय सम्मेलन’ जुन ३० देखि जुलाई २ सम्म चलेको थियो। प्रधानमन्त्री ओली पनि सहभागी भएको उक्त कार्यक्रममा सुरुमा प्रधानमन्त्रीकै प्रतिनिधिमण्डलमा गएका व्यक्तिहरू नेपाल नफर्किएको आरोप लागेको थियो।
तर पछिल्लो समय मानव तस्करीमा संलग्न गिरोहले विभिन्न एनजिओका सिफारिसका आधारमा त्यहाँ मानिस पठाएर मानव तस्करी गरेका समाचार आइरहेका छन्।
यही विषयमा सोमबार गृहमन्त्री रमेश लेखकले सुरक्षा अधिकारीहरूलाई बोलाएर चासो व्यक्त गरेका थिए। जसमा प्रहरी महानिरीक्षक दीपक थापा, सिआइबी प्रमुख खापुङ, अध्यागमन विभागका महानिर्देशक गोविन्द रिजालका अधिकारीहरू सहभागी थिए।
त्यही बैठकले यो प्रकरणबारे प्रहरीले छानबिन गर्नुपर्ने निष्कर्ष निकालेको थियो। सोही निष्कर्षपछि सिआइबीले अनुसन्धान थालेको जनाएको छ। नागरिक
