वीरगञ्ज । वीरगञ्ज महानगरपालिका वडा नं. ११ श्रीपुरस्थित श्री गणेश भगवानको मन्दिर निर्माण कार्य तीव्र रूपमा अगाडि बढाइएको छ । हिन्दु सनातन धर्म, संस्कृति तथा धार्मिक आस्थाको संरक्षण र प्रवर्द्धन गर्ने उद्देश्यले निर्माण भइरहेको उक्त मन्दिर क्षेत्रका श्रद्धालुहरूका लागि भविष्यमा महत्वपूर्ण धार्मिक केन्द्र बन्ने विश्वास गरिएको छ ।
मन्दिर निर्माण उपभोक्ता समितिका अध्यक्ष दिपेन्द्र महतोका अनुसार “श्री भुनेश्वरनाथ महादेव मन्दिर” उपभोक्ता समितिमार्फत निर्माण भइरहेको यस आयोजनाको कुल लागत रकम रु. २४ लाख ७६ हजार ४४८ रुपैयाँ ०२ पैसा रहेको छ । जसमा जनश्रमदानतर्फ रु. १ लाख ३६ हजार ४४८ रुपैयाँ ०२ पैसा बराबरको योगदान रहेको बताइएको छ ।
आयोजना सम्झौता मिति २०८३ साल वैशाख ४ गते तय गरिएको छ भने निर्माण कार्य आगामी २०८३ साल असार १० गतेभित्र सम्पन्न गर्ने लक्ष्य राखिएको अध्यक्ष महतोले जानकारी दिनुभयो ।
स्थानीय समाजसेवी तथा धर्मप्रेमीहरू बिर्जी महतो धानुक, किसान महतो काहार, माधो साह, शम्भु महतो धानुक लगायतको उपस्थितिमा संयासी बाबा श्री कृणा गिरीले मन्दिर निर्माणबारे जानकारी सार्वजनिक गर्नु भएको थियो ।
स्थानीयवासीका अनुसार श्री गणेश भगवानको मन्दिर निर्माणसँगै श्रीपुर क्षेत्रमा धार्मिक, सांस्कृतिक तथा सामाजिक गतिविधि अझ सशक्त बन्ने अपेक्षा गरिएको छ । हिन्दु सनातन परम्परामा भगवान गणेशलाई शुभकार्यका आराध्य देवका रूपमा पूजा गरिने भएकाले मन्दिर निर्माणले धार्मिक पर्यटन तथा सामाजिक एकतालाई समेत टेवा पुग्ने विश्वास गरिएको छ ।
“धर्म, संस्कृति र सभ्यताको संरक्षण हाम्रो साझा दायित्व हो” भन्ने सन्देशसहित स्थानीयवासीहरूले मन्दिर निर्माण कार्यमा सहयोग र सहभागिता जनाइरहेका छन् । सनातन संस्कृतिको संरक्षणका लागि यस्ता धार्मिक संरचनाले नयाँ पुस्तामा पनि धार्मिक चेतना र संस्कारको विकास गर्न महत्वपूर्ण भूमिका खेल्ने स्थानीय बुद्धिजीवीहरूको भनाइ रहेको छ ।
