बारा । जितपुरसिमरा उपमहानगरपालिका-५ स्थित सिर्सिया कुलो (बर्खी बाँध)मा डुबेर मृत्यु भएको बालकको शव उद्योगअगाडि राखेर प्रदर्शन गरिएको छ। जितपुरसिमरा उपमहानगरपालिका-५ का १३ वर्षीय बालक सन्दीप मुखियाको शव गणपति घ्यू र नन्दन घ्यू उद्योगअगाडि राखेर क्षतिपूर्तिको माग गर्दै प्रदर्शन गरिएको हो।
मुखियाको मृत्यु उद्योगबाट निस्केको प्रदूषित पानीको कारणले भएको भन्दै मुखियाका आफन्तले ती उद्योगअगाडि शनिबार शव तेर्स्याएर प्रदर्शन गरे। उद्योगबाट निस्केको प्रदूषित पानी जमेको कुलोमा डुबेर छोराको मृत्यु भएको भन्दै मृतकका आमा अञ्जुले आफन्तसँगै छोराको शवसहित प्रदर्शनमा उत्रेकी थिइन्।
गणपति घ्यू, नन्दन घ्यू, अशोक स्टिललगायतका उद्योगबाट निस्कने प्रदूषित र रसायनयुक्त पानी उक्त कुलो हुँदै बग्ने गरेको बताइएको छ। ‘ती उद्योगबाट निस्कने पानी दूषित नभएको भए मेरो छोराको ज्यान जाने थिएन,’ मृतक सन्दीपका आमा अञ्जुले भनिन्, ‘उद्योगबाट निस्केको दूषित पानीले छोराको ज्यान लियो।’
प्रशोधन नगरी छोडिएको प्रदूषित पानीका कारण उक्त क्षेत्र अत्यन्तै दुर्गन्धित भएको स्थानीयले बताएका छन्। दुर्गन्धित र प्रदूषित पानीमा बालकको शव भेटिएपछि शव परीक्षणका लागि वीरगन्जस्थित नारायणी उपक्षेत्रीय अस्पतालमा लगिएको थियो। शव परीक्षणका क्रममा बालकको मृत्यु विषाक्त पानीकै कारण भएको देखिएको छ।
मृतकका आफन्त र स्थानीयले क्षतिपूर्तिसहित उद्योगलाई कारबाहीको माग गर्दै प्रदर्शनमा उत्रेपछि गणपति घ्यू उद्योग र नन्दन घ्यू उद्योगले तीन-तीन लाख रुपैयाँ क्षतिपूर्ति दिएको इलाका प्रहरी कार्यालय सिमराका प्रहरी नायब उपरीक्षक वेदप्रकाश जोशीले जानकारी दिए। डिएसपी जोशीका अनुसार पीडित पक्ष, जनप्रतिनिधि र उद्योग प्रशासनबिच छलफलपछि उक्त क्षतिपूर्ति रकम दिइएको हो।
बालकको शव तेर्स्याएर पीडित पक्ष उद्योगअगाडि प्रदर्शन गर्दा उद्योगी र मृतकका आफन्तलाई एकै ठाउँमा राखेर छलफलको वातावरण बनाइएको थियो। उद्योगले गरिरहेको प्रदूषणबारे बाराका सहायक प्रजिअको नेतृत्वमा टोली बनाइएको र टोलीले उद्योगको अनुगमन गरेर दिएको प्रतिवेदनको आधारमा कारबाही गरिने जोशीले बताए।
घटनापछि जितपुरसिमरा उपमहानगरपालिकाले शनिबार उद्योगले प्रदूषित पानी छाड्ने स्थानमा डोजर लगाएको छ। सार्वजनिक जग्गामा पानी छोड्न प्रयोग गरिएको ह्युमपाइप हटाउँदै उपमहानगरपालिकाले खाल्डो पुरेको हो। उपमहानगरपालिकाले यसअघि पनि उद्योगको पर्खाल भत्काएर ह्युमपाइप हटाएको थियो। तर उद्योगले पुनः ह्युमपाइपको प्रयोग गर्दै उद्योगको प्रदूषित पानी प्रशोधन नगरी छाड्ने गरेको थियो।
स्थानीय सरकार र स्थानीय प्रशासनलाई अटेर गर्दै आएको उद्योगका कारण स्थानीय आजित छन्। उद्योगका कारण बस्तीका नागरिक प्रभावित हुनुका साथै प्रदूषित पानीले वातावरणमा पनि असर परिरहेको छ। उपेन्द्र यादव / नागरिक दैनिक
