काठमाडौं । एकता होटल तथा गेष्टहाउस व्यवसायी संघ, नेपालको तेह्रौं वार्षिक साधारणसभा तथा सातौं अधिवेशन सम्पन्न भएको छ। अधिवेशनले संघको नेतृत्वमा पुनः सरोज आलेलाई सर्वसम्मत रूपमा अध्यक्षमा चयन गरेको छ।
अध्यक्ष आलेको नेतृत्वमा निर्वाचित नयाँ कार्यसमितिमा वरिष्ठ उपाध्यक्ष सलमान लिम्बु, द्वितीय उपाध्यक्ष तिलक प्रसाद चापागाईं, तृतीय उपाध्यक्ष प्रज्वल श्रेष्ठ, महासचिव अनिश बानियाँ, सचिव कुशल श्रेष्ठ, कोषाध्यक्ष सन्दीप पाण्डे, सह–कोषाध्यक्ष गोपाल कोइराला रहेका छन्। कार्यसमिति सदस्यहरूमा गोमा लिम्बु, जुनु सुब्बा, ईश्वर पौडेल, चण्डेश्वर श्रेष्ठ, यादव सुवेदी, दिपेन्द्र यादव, खेम प्रसाद घिमिरे, शम्भु पौडेल र दीपक पोखरेल चयन भएका छन्।
त्यस्तै लेखा समिति संयोजकमा ध्रुवकुमार श्रेष्ठ चयन हुनु भएको छ भने सदस्यमा राजु थापा र उमादेवी राई रहेका छन्। उक्त अधिवेशनको उद्घाटन नेपाल सरकारका संस्कृति, पर्यटन तथा नागरिक उड्डयनमन्त्री माननीय बद्री प्रसाद पाण्डेले गर्नुभएको थियो। कार्यक्रमका विशिष्ट अतिथि वरिष्ठ पर्यटनविद्, समाजसेवी तथा लेखक कर्ण शाक्य हुनुहुन्थ्यो।
कार्यक्रममा नेपाल पर्यटन बोर्डका उपाध्यक्ष रामप्रसाद सापकोटा, होटल व्यवसायी महासंघ नेपालका अध्यक्ष दिनेश कुमार चुके, होटल संघ नेपालका कोषाध्यक्ष युवराज श्रेष्ठलगायत विशिष्ट अतिथिहरूको उपस्थिति थियो। कार्यक्रममा बागमती प्रदेश होटल तथा पर्यटन व्यवसायी संघका अध्यक्ष दामोदर नेपाल, जिल्ला होटल व्यवसायी संघ काठमाडौंका अध्यक्ष सुरेश बराल, प्रहरी वृत्त गौशालाका प्रमुख प्रहरी नायब उपरीक्षक सुकदेव खनाल, संघका निवर्तमान अध्यक्ष तथा प्रमुख सल्लाहकार ऋषिकुमार चौलागाईं, संस्थापक अध्यक्ष ज्ञानु गजमेर, पूर्व अध्यक्ष मोहन थेबे, नेपाली होटल व्यवसायी संघका अध्यक्ष गणेश ढकाल, कलंकी होटल व्यवसायी संघका अध्यक्ष रमेश बराल, सुन्धारा होटल व्यवसायी संघका अध्यक्ष देवीप्रसाद कडेल, काठमाडौं होटल व्यवसायी संघका अध्यक्ष ध्रुवबहादुर कार्की, बालाजु होटल व्यवसायी संघका उपाध्यक्ष नरिश्वर गौतमसहित विभिन्न संघसंस्थाका प्रतिनिधि, सञ्चारकर्मी, सुरक्षाकर्मी र स्थानीय जनप्रतिनिधिहरूको उल्लेख्य उपस्थिति थियो।
करिब ४५० भन्दा बढी होटल तथा गेष्टहाउस व्यवसायीहरूको सहभागितामा सम्पन्न अधिवेशन अत्यन्त सफल रहेको आयोजक संघले जनाएको छ। अधिवेशनलाई सम्बोधन गर्दै मन्त्री पाण्डेले नेपाल विश्व पर्यटन नक्शामा उभिन सक्ने अपार सम्भावना बोकेको मुलुक भएको उल्लेख गर्नुभयो। “पशुपतिनाथ, शान्तिका प्रतीक बुद्धको जन्मस्थल लुम्बिनी, सगरमाथाजस्ता अमूल्य सम्पदाको प्रभावकारी प्रचारप्रसार गरी आन्तरिक तथा बाह्य पर्यटन प्रवर्द्धनमा लाग्न आवश्यक छ,” उहाँले भन्नुभयो।
मन्त्री पाण्डेले यसका लागि आफू पर्यटन मन्त्रालयको हैसियतबाट पूर्ण रूपमा प्रतिबद्ध रहेको बताउनुभयो। कार्यक्रममा पर्यटनविद् कर्ण शाक्यले विगतदेखि हालसम्मको पर्यटन र होटल व्यवसायको अवस्थाबारे आफ्ना अनुभव तथा विश्लेषण प्रस्तुत गर्नुभएको थियो।
