पर्सा । पर्साको पटेर्वासुगैली गाउँपालिका वडा नम्बर २ बेलवा टाडीमा आज भूमि सम्बन्धी विशेष छलफल कार्यक्रम तथा नापनक्सा कार्यको औपचारिक शुभारम्भ गरिएको छ। कार्यक्रम पालिका अध्यक्ष दिनेश कुमार चौधरीको अध्यक्षता, भूमि समस्या समाधान आयोग पर्साका अध्यक्ष तबरेज अहमदको प्रमुख आतिथ्यता तथा बैजनाथ महतोको सञ्चालनमा सम्पन्न भएको हो।
उक्त कार्यक्रममा आयोगले आजैदेखि बेलवा टाडी क्षेत्रबाट भूमिहीन दलित तथा सुकुम्बासीको नापी कार्य विधिवत रूपमा सुरु गरेको जानकारी गराइएको छ। साथै, आयोगले रङपुर बजारको नापी कार्य यही साता बिहीबारदेखि सुरु हुने बताएको छ।
कार्यक्रममा बोल्दै आयोगका अध्यक्ष अहमदले भूमि अधिकारका लागि सामाजिक दबाब आवश्यक रहेको धारणा राखे। “बच्चाले नरोएसम्म आमाले दूध खुवाउँदिन, त्यसैगरी हामीले पनि हाम्रो अधिकारका लागि आवाज उठाउन तयार हुनुपर्छ,” उनले भने। साथै उनले भूमिहीन समुदायका मागलाई संस्थागत ढंगले अघि बढाउन आह्वान गर्दै, “यो नापी कार्य प्रक्रिया मात्र नभइ न्यायको यात्रा हो,” भन्दै भूमि अधिकार प्राप्तिको ढोका खुल्ने विश्वास व्यक्त गरे।
कार्यक्रममा उपप्रमुख ममता महतो, प्रमुख प्रशासकीय अधिकृत प्राण मेहता, वडा अध्यक्ष बिजय गैरे, नापी अधिकृत राजकुमार बिक, आयोगका प्रशासन प्रमुख राजेन्द्र खड्का, अमिन टोलीका सदस्यहरू तथा सयौं स्थानीय बासिन्दाको सक्रिय सहभागिता रहेको थियो। कार्यक्रमको अन्त्यमा सहजीकरण समितिका तर्फबाट पनि कार्यक्रम सफलताको शुभकामना व्यक्त गरिएको थियो।
