वीरगंज । वीरगंज महानगरपालिका वडा नम्बर ११ का वडाध्यक्ष अजयकुमार चौरसिया विवादमा तानिएका छन्। स्थानीय श्रीपुर गाउँतर्फ जाने मुख्य सडक आफैं कब्जामा लिएर घर निर्माण गर्दै गर्दा उनले सार्वजनिक आवागमनमा ठूलो समस्या खडा गरेका छन्।
वडाध्यक्ष चौरसियाले निर्माण कार्यका लागि सडकमै माटो, गिट्टी, बालुवा, ढुंगाजस्ता निर्माण सामग्री राखेका कारण सवारीसाधनको आवतजावत पूर्ण रूपमा अवरुद्ध भएको छ। यसले गर्दा बिहानैदेखि मुर्लीचोकस्थित मुख्य सडकमा ट्राफिक जाम सिर्जना भएको छ, जसले दैनिक यात्रा गर्ने यात्रु र चालकहरूलाई हैरानीमा पारिरहेको छ।
एक स्थानीय बासिन्दाका अनुसार, "हामीले कस्तो जनप्रतिनिधि निर्वाचित गर्यौं भन्नेमा अहिले पश्चाताप भइरहेको छ। सडक जाम गरेर निर्माण सामग्री राख्नु कतिसम्म जायज हो? यो जनताका समस्या समाधान गर्ने होइन, जनतालाई थप पीडा दिने काम हो।"
सडक अवरुद्ध भएपछि आपतकालीन सेवामा समेत असर परेको देखिन्छ। स्थानीयवासीहरू भन्छन्, “यदि कुनै विपद् आयो भने एम्बुलेन्स, दमकल, प्रहरीलगायत आपतकालीन सवारीसाधनहरूलाई आवागमनमा ठूलो समस्या पर्नेछ।”
वडाध्यक्षबाटै यस्ता गैरजिम्मेवार क्रियाकलाप भएपछि स्थानीयहरू आक्रोशित छन्। उनीहरूले तत्काल सडक खुलाउन र जनताको समस्या समाधान गर्न सम्बन्धित निकायसँग माग गरेका छन्।
सार्वजनिक सम्पत्तिमा यसरी निजी स्वार्थको लागि अवरोध गर्नु कत्तिको उचित हो भन्ने प्रश्न अहिले उठिरहेको छ।
