पर्सा । पर्सा जिल्लाका सक्रिय युवा नेता अनिल पटेल युवा संघ नेपालको उप महासचिव तथा मधेश प्रदेश ईन्चार्जमा नियुक्त भएका छन्। सञ्जीव राईको नेतृत्वमा गठन गरिएको २२१ सदस्यीय नयाँ केन्द्रीय कमिटीमा पटेललाई यो जिम्मेवारी दिइएको हो।
डेढ दशकदेखि युवा संघ नेपालको राजनीतिमा क्रियाशील पटेल एकीकृत समाजवादी पार्टी निकट नेताका रूपमा परिचित छन्। उनी हालसम्म पर्सा जिल्लाको समाजवादी पार्टीका ईन्चार्जको भूमिकामा थिए। संगठन निर्माणमा पटेलको सक्रियता र कार्यदक्षता पार्टीभित्र उच्च मूल्याङ्कन गरिँदै आएको छ।
नयाँ नेतृत्वको कमिटी झलनाथ खनाल निकट नेताहरूको सक्रियतामा बनेको हो। माधव नेपाल पक्षधर रोशन थापा नेतृत्वको कमिटीप्रति असन्तुष्टि जनाउँदै समानान्तर कमिटी गठन गरिएको जनाइएको छ।
सञ्जीव राईको अध्यक्षतामा बनेको नयाँ कमिटीमा मधेश प्रदेशबाट अन्य धेरै युवा नेताहरू पनि समावेश छन्। उप महासचिव अनिल पटेलसँगै अनुशासन आयोग प्रमुखमा शैलेन्द्र यादव, कोषाध्यक्षमा मोहन विक्रम पाण्डे चयन भएका छन्।
यसैगरी, केन्द्रिय आयोजक कमिटीमा मधेश प्रदेशबाट राज श्रीवास्तव, उपेन्द्र पटेल, मनोज सिंह, सन्दीप पटेल, लालबाबु मण्डल, तारकेश्वर चौबे, दीपेश अधिकारी, बजरंगी यादव, हरिओम साह, माधव यादव, शुशिला चौधरी, लता मण्डल, दीपक कुमार साह, विनय प्रविन, मुकेश गोइत यादव, जायनाथ साह लगायतका युवा नेताहरू चयन भएका छन्।
नयाँ कमिटीले संगठनलाई थप बलियो बनाउँदै मधेशमा समाजवादी विचारधाराको सशक्त प्रतिनिधित्व गर्ने अपेक्षा गरिएको छ।
