बारा । आर्थिक प्रलोभनमा परी राजमार्गमा ओभरलोड ट्रकलाई संरक्षण दिएको आरोप लागेपछि राजमार्ग सुरक्षा तथा ट्राफिक व्यवस्थापन कार्यालय, पथलैयालाई ‘बाइपास’ गर्दै जिल्ला प्रहरी कार्यालय, बाराले ५२ वटा ओभरलोड ट्रक नियन्त्रणमा लिएको छ।
मधेश प्रदेश प्रहरी प्रमुखको प्रत्यक्ष निर्देशनमा ट्राफिक प्रहरीको भूमिकामाथि नै प्रश्न उठाउँदै जिल्ला प्रहरी आफैँ कारबाहीमा उत्रिएको हो।
मधेश प्रदेश प्रहरी प्रमुख, प्रहरी नायब महानिरीक्षक (डिआईजी) उमा चर्तुवेदीले पथलैयास्थित ट्राफिक प्रहरी कार्यालयले ओभरलोड नियन्त्रण गर्न पटक-पटक दिएको निर्देशनलाई अटेरी गरेपछि आफूले जिल्ला प्रहरी कार्यालय, बारालाई सिधै कारबाही गर्न आदेश दिएको बताए।
‘पथलैया ट्राफिकले अटेरी गरेपछि ओभरलोड बोक्ने साधनहरूलाई नियन्त्रणमा लिन बारा प्रहरीलाई निर्देशन दिइएको हो,’ डिआईजी चर्तुवेदीले भने।
लामो समयदेखि नेपाली ट्रक व्यवसायीहरूले पथलैया ट्राफिक कार्यालयले आर्थिक लाभ लिएर भारतीय ओभरलोड ट्रकलाई संरक्षण दिइरहेको आरोप लगाउँदै आएका थिए।
तराई ट्रक व्यवसायी संघका अध्यक्ष ओमबहादुर कार्कीका अनुसार, उनीहरूले यस विषयमा गृहमन्त्री र प्रहरी महानिरीक्षकसम्मलाई ज्ञापनपत्र बुझाएका थिए, जसपछि प्रहरी प्रधान कार्यालयले साउन ४ गते नै ओभरलोड नियन्त्रण गर्न परिपत्र जारी गरेको थियो।
‘तर पथलैया ट्राफिक प्रमुख प्रहरी उपरीक्षक राजकुमार सिलवालले उक्त परिपत्र कार्यान्वयन गर्नुको सट्टा ओभरलोड गाडीलाई छुट दिइरहनुभयो,’ अध्यक्ष कार्कीले आरोप लगाए।
प्रदेश प्रहरी प्रमुखको निर्देशनलगत्तै जिल्ला प्रहरी कार्यालय, बारा र इलाका प्रहरी कार्यालय, सिमराको संयुक्त टोलीले शुक्रबार कारबाही थालेको थियो।
बाराका प्रहरी प्रमुख, प्रहरी उपरीक्षक सन्तोष तामाङका अनुसार, नियन्त्रणमा लिइएका ५२ ट्रकहरूमध्ये ३८ वटा भारतीय र १४ वटा नेपाली नम्बर प्लेटका छन्। २० टन क्षमताका भारतीय ट्रकहरूले ४० टनभन्दा बढी मार्बल, अलकत्रा र अन्य कच्चा पदार्थ बोकेको पाइएको छ।
नियन्त्रणमा लिइएका सबै सवारी साधनलाई यातायात व्यवस्था ऐनअनुसार कारबाहीका लागि आइतबार यातायात व्यवस्था कार्यालय पठाइने तयारी भइरहेको प्रहरी उपरीक्षक तामाङले जानकारी दिए।
यता, आफूमाथि लागेको आरोप अस्वीकार गर्दै राजमार्ग सुरक्षा तथा ट्राफिक व्यवस्थापन कार्यालय, पथलैयाका प्रमुख प्रहरी उपरीक्षक राजकुमार सिलवालले आफूले आर्थिक प्रलोभनमा कुनै काम नगरेको दाबी गरेका छन्।
उनले जिल्ला प्रहरीले थालेको कारबाहीमा सहयोग गर्न आफ्ना ट्राफिक प्रहरीलाई निर्देशन दिइसकेको बताए। उपेन्द्र यादव / नागरिक दैनिक
