वीरगन्ज । जनता समाजवादी पार्टी (जसपा)का उपमहासचिव प्रदीप यादवले आगामी फागुन २१ मा हुने प्रतिनिधी सभाको चुनावमा जसपाले भाग लिने बताएका छन् । जसपा पर्सा द्वारा वीरगंजको नगरसभा गृहमा आयोजित जसपाको अगुवा कार्यकर्ता भेलालाई सम्बोधन गर्दै प्रमुख अतिथी पूर्व खानेपानीमन्त्री समेत रहेका यादवले आगामी चुनावमा भाग लिन जसपा तयार रहेको बताएका हुन् ।
उनले भने, अहिलेको अन्तरिम सरकार चुनाव गराउनकै लागि बनेको हो । त्यसैले सरकार इमान्दार भएर तोकिएकै मितिमा चुनाव गराओस्, जसपा चुनावमा भाग लिन तयार छ । जेनजी आन्दोलनको जगमा बनेको सुशीला कार्की नेतृत्वको सरकारले फागुन २१ मा तोकिएको चुनावको वातावरण बनाउनमा लाग्नुपर्नेमा उनले जोडदिए ।
पूर्वमन्त्री यादवले भने, हिन्दी फिल्म नायकको हिरो अनिल कपूरजस्तै बन्नुछ भने प्रधानमन्त्री सुशीला कार्कीले इमान्दार भएर फागुन २१ मै चुनाव गराउनु पर्छ । त्यसका लागि अहिलेदेखि नै सरकारले चुनावको वातावरण बनाउनमा लाग्नुपर्छ । राजनीतिक दलहरुलेपनि चुनावको माहौल बनाउनमा जुट्नुपर्छ । उनले चुनावको तयारीमा लाग्न जसपाका अगुवा नेताकार्यकर्ताहरुलाई निर्देशनपनि दिए । जेनजी आन्दोलनपछि मधेस र मधेसीमाथि खतरनाक प्रहार भइरहेको भन्दै उनले भने,अहिलेको राजनीतिक तरलताको मौका छोपेर संघीयतामाथि प्रहार भइरहेको छ ।केहि तत्वहरु संघीयतालाई समाप्त पार्ने कोशीश गरिरहेका छन् । त्यसका कारण संघीयतालाई जोगाउन मधेसी जनता सावधान हुन जरुरी छ ।
संघीयता मधेस आन्दोलनको उपज र मधेसको पहिचान भएको भन्दै उनले यसको रक्षा मधेस र मधेसीले गर्नुपर्ने बताए । उनले भने, २०७२ अघिको अवस्थामा जुन अवस्थामा मधेसी थिए फेरि त्यहि अवस्थामा मधेसीलाई फर्काउने चलखेल भइरहेको छ । तर यदि संघीयता लगायतका मधेसका मुद्धा प्रति आक्रमण भयो भने फेरि हामी सबै मधेसी एकढिक्का भई लाठी डन्टा लिएर उत्रिनुपर्छ । अहिले जेनजीको नाममा सरकारी कर्मचारीलाई धम्क्याउने, नेताहरुको राजिनामा माग्ने जस्ता अराजक गतिविधी भइरहेकाले यसलाई सरकारले नरोके मुलुक फेरि अर्को दिशामा जाने खतरा रहेको पूर्वमन्त्री यादवले बताए। त्यसका कारण जेनजीको नाममा धम्क्याउनेहरुलाई सरकारले कानुनी दायरामा ल्याउनुपर्नेमा उनले जोड दिए ।
अहिले नयाँ पुस्तालाई नेतृत्व दिनुपर्छ भन्ने आवाज उठिरहेको सन्दर्भमा यादवले भने, केवल नयाँ पुस्ताले मात्रै देश बन्न सक्दैन । नयाँ पुस्तासंगै अनुभवी पुस्ताकोपनि साथपनि चाहिन्छ। नयाँ पुस्ताको जोश र बुज्रुक (अनुभवी)को होस संगसंगै रह्यो भने मात्रै देशले निकास पाउन सक्छ । जेनजीको नाममा धम्क्याएर देशको भ्रष्टाचार नियन्त्रण नहुने र देशमा सुशासनपनि नआउने भन्दै उनले भने,भ्रष्टाचार नियन्त्रण र सुशासनका लागि नयाँ जनादेश चाहिन्छ । नयाँ जनादेश चुनावबाट प्राप्त हुन्छ ।
चुनावबाट आउने नयाँ जनादेशले बन्ने नयाँ सरकार र नयाँ नेतृत्वले मात्रै भ्रष्टचारीलाई जेल हाल्न सक्छ । सुशासन कायम गराउन सक्छ । पूर्वमन्त्री यादवले जेनजी आन्दोलनका क्रममा युवा विद्यार्थीमा माथि भएको गोली प्रहारप्रति दुःख व्यक्त गरे । जेनजी आन्दोलनको समर्थनमै आँफुले भदौं २४ को बिहानै मन्त्री पदबाट राजीनामा दिएको जिकिर उनले गरे ।आँफुसहितका नेताहरुको घर तथा सार्वजनिक सम्पतिहरुमा गरिएको लुटपाट र आगजनी गर्ने जेनजी थिए या अरु कोहि थिए ? यो कुरा कसैबाट नलुकेको उनको भनाई थियो । उनले वर्तमान सरकार संविधान सम्मत नभएपनि जेनजीको भावना र चाहना अनुसार यो सरकार बनेको बताए ।
संविधान संम्मत नहुदाँ नहुदैंपनि संविधान र लोकतन्त्रको रक्षासंगै राष्टिय एकताका लागि राष्टपति रामचन्द्र पौडेलले नागरिकको सरकार गठनका लागि निर्वाह गरेको भूमीकालाई आफ्नो सम्मान रहेको उनले सुनाए । साथै नेपालको संविधान र लोकतन्त्र रक्षा तथा शान्तिका लागि छिमेकी मुलुक भारतले खेलेको भूमीकाकोपनि उनले प्रशंसा गरे । जेनजी आन्दोलनपछि नेपाल प्रहरीको मनोबल गिरेको भन्दै जसपा उपमहासचिव यादवले नेपाल प्रहरीको गिरेको मनोबल उच्च बनाउनका लागि अहिलेको सरकारले ध्यान दिनुपर्ने बताए ।
उनले भने, नेपाल प्रहरीको संख्या र हातहतियार थप्नुपर्छ । सेनालाई जस्तै नेपाल प्रहरीका लागिपनि हेलिकप्टरको व्यवस्था गर्नुपर्छ। लोकतन्त्र र संविधानको रक्षा गर्दै नागरिकको सरकार गठनमा नेपाली सेनाले रचनात्मक भूमीका निर्वाह गरेको भन्दै उनले त्यसबेलाको विषम परिस्तिीमा राष्टपति, तत्कालीन प्रधानमन्त्री र सांसदहरुको सुरक्षाका लागि सेनाको भूमीका सह्रानीय रहेको बताए। जसपा पर्साका अध्यक्ष सिगासन सा तेलीको अध्यक्षतामा सम्पन्न सो भेलामा पार्टीका केन्द्रिय सदस्य तथा वीरगन्ज महानगरका मेयर राजेशमान सिंह, केन्द्रिय सदस्यहरु जनार्दन यादव, पुरुषोत्रम झा, मोहनलाल चौधरी,सलमा खातुन, मुकेश द्धिवेदी लगायतकाले पनि सम्बोधन गरेका थिए । सो कार्यक्रममा स्वागत मन्तव्य पार्टीका महानगर अध्यक्ष ईश्वर चन्द्र यादवले राखेका थिए।
