पर्सा । पर्साको जिराभवानी गाउँपालिका अन्तर्गत रहेको गादीमाई साझेदारी वन उपभोक्ता समूहका अध्यक्ष सहरम राउत गद्दीविरुद्ध कारबाही गर्न सिफारिस गरिएको करिब दुई महिना बित्न लाग्दा पनि हालसम्म कुनै ठोस कारबाही अघि नबढेको भन्दै प्रश्न उठ्न थालेको छ ।
बसन्तपुर सब–डिभिजन वन कार्यालयले वन क्षेत्रमा छपान गरिएको सिसौका रुख अवैध रूपमा कटानी गरिएको पाइएको भन्दै अध्यक्ष गद्दीविरुद्ध कारबाही गर्न डिभिजन वन कार्यालय पर्सामा पत्राचार गरेको थियो । तर लामो समय बितिसक्दा पनि सम्बन्धित निकायबाट कुनै निर्णय नआएपछि स्थानीय स्तरमा असन्तुष्टि बढ्दै गएको छ ।
सब–डिभिजन वन कार्यालयका प्रमुख वन अधिकृत मुबारक अली गद्दीका अनुसार वन क्षेत्रमा गरिएको अनुगमनका क्रममा छपान गरिएको दुई वटा सिसौका रुख काटिएको भेटिएको थियो । सोही आधारमा रुखको गोलाइ, उचाइ तथा जीपीएस विवरणसहित कारबाहीका लागि डिभिजन वन कार्यालयमा सिफारिस पठाइएको उनले बताए ।
स्थानीय बासिन्दाले भने वन संरक्षण गर्ने जिम्मेवारी पाएका व्यक्तिविरुद्ध कारबाहीमा ढिलाइ हुनु शंकास्पद भएको बताएका छन् । उनीहरूले डिभिजन वन कार्यालय पर्साका प्रमुख डिभिजनल वन अधिकृत मन्जुर अहमद र वन समूहका अध्यक्ष गद्दीबीच मिलेमतो भएको आशंका समेत व्यक्त गरेका छन् ।
यसअघि स्थानीयहरूले बसन्तपुर सब–डिभिजन वन कार्यालय घेराउ गर्दै गादीमाई साझेदारी वन उपभोक्ता समूहको कार्यालयमा तालाबन्दी समेत गरेका थिए ।
यता डिभिजन वन कार्यालय पर्साका प्रमुख डिभिजनल वन अधिकृत मन्जुर अहमदले भने घटनाबारे अनुसन्धान भइरहेको बताउँदै आवश्यक प्रक्रिया पूरा भएपछि कारबाही गरिने बताएका छन् ।
स्थानीयहरूले भने “सिफारिस मात्रै होइन, दोषीमाथि कारबाही हुनुपर्छ” भन्दै छानबिन निष्पक्ष नभए थप आन्दोलन गर्ने चेतावनी दिएका छन् ।
