जनकपुरधाम । मधेश प्रदेश सभा सदस्यहरूले प्रदेशलाई अधिकार सम्पन्न र बलियो संघीयता निर्माण गर्न नवगठित सरकारसँग उच्च अपेक्षा व्यक्त गरेका छन् ।
मधेश प्रदेश सभाको आइतबार बसेको छैटौं अधिवेशनको १४औं बैठकमा बोल्दै सांसदहरूले संघीयतालाई संस्थागत गर्दै प्रदेशको अधिकार सुनिश्चित गर्न सबै दल एकजुट हुनुपर्नेमा जोड दिएका हुन् ।
सभाको बैठकमा नेपाल कम्युनिस्ट पार्टी (नेकपा एमाले) मधेश प्रदेश संसदीय दलका नेता सरोजकुमार यादवले संघीय लोकतान्त्रिक गणतन्त्रलाई अझ बलियो बनाउन वर्तमान सरकारलाई एमालेको साथ रहने बताउँदै प्रतिशोधपूर्ण राजनीति नगर्न र कानुनअनुसार अघि बढ्न सरकारलाई सुझाव समेत दिनुभयो । साथै उहाँले वर्तमान सरकारले मधेशलाई उपेक्षा गरेको आरोप समेत लगाउनुभयो । उहाँले अन्य प्रदेशको तुलनामा मधेशबाट बढी जनमत प्राप्त भएकाले सोहीअनुसार प्राथमिकता दिनुपर्ने बताउनुभयो ।
यस्तै प्रदेश सभा सदस्य जयनुल राईनले प्रदेशलाई अधिकार सम्पन्न बनाउन नयाँ सरकार गम्भीर भएर अघि बढ्नुपर्ने बताउनुभयो । उहाँले बहुवर्षीय योजनाहरु अलपत्र परेको उल्लेख गर्दै ती योजनाहरू शीघ्र सम्पन्न गर्न माग समेत गर्नुभयो ।
यस्तै प्रदेश सभा सदस्य चन्दनकुमार सिंहले संघीयतालाई बलियो बनाउँदै प्रदेशको पहिचानलाई स्थायित्व दिनुपर्ने धारणा राख्नुभयो । त्यस्तै प्रदेश सांसद जिवछी कुमारी यादवले दुई तिहाइको सरकार बनेको सन्दर्भ उल्लेख गर्दै मधेशमा दाइजो प्रथाका कारण महिलामाथि हुने हिंसा अन्त्य हुनुपर्ने र महिलाले सुरक्षित अनुभूति गर्न पाउनुपर्नेमा जोड दिनुभयो ।
सांसद ललिता दासले नवगठित सरकारले मधेशी दलित समुदायलाई समुचित स्थान दिनुपर्ने बताउनुभयो । उहाँले मधेशबाट मत लिएर पनि मधेशी दलितलाई अवसर नदिइएकोप्रति असन्तुष्टि व्यक्त गर्दै नगठित सरकारलाई आवेगमा प्रतिक्रिया नदिन सुझाव समेत दिनुभयो ।
यसैगरी, सांसद कौशल रायले जनअपेक्षा अनुसार काम नहुँदा वर्तमान परिवर्तन आएको उल्लेख गर्दै विगतका अधुरा योजनाहरू पूरा गर्न सरकारलाई आग्रह गर्नुभयो ।
प्रदेश सांसदहरुको प्रदेश स्थापनाको आठ वर्ष पुग्दा पनि प्रदेशले पूर्णता नपाएको भन्दै भन्दै संघीयतालाई व्यवहारिक रूपमा कार्यान्वयन गर्न वर्तमान सरकारसँग अग्रह गरेका छन् । साथै प्रदेशलाई अधिकार सम्पन्न बनाउने दिशामा नवगठित सरकारले ठोस कदम चाल्नुपर्ने आवश्यकता समेत औंल्याएका छन् । गोरखापत्र अनलाइन
