वीरगन्ज । पर्सा निर्वाचन क्षेत्र नं. २ बाट प्रतिनिधि सभा सदस्यमा निर्वाचित सुशीलकुमार कानु २०७९ सालको स्थानीय तहको निर्वाचनमा वीरगन्ज महानगरपालिका–१० को वडाध्यक्ष पदमा निर्वाचित व्यक्ति हुनुहुन्छ । वडाध्यक्ष पदबाट राजीनामा दिएर राष्ट्रिय स्वतन्त्र पार्टीका तर्फबाट प्रतिनिधि सभाको निर्वाचनमा पहिलो पटक उम्मेदवारी दिएका कानु निर्वाचित हुनुभयो ।
कानुले निर्वाचनमा ३० हजार ७४० मत प्राप्त गर्नुभयो भने उहाँका निकटतम प्रतिद्वन्द्वी पूर्वमन्त्री एवं नेपाली कांग्रेसका उम्मेदवार अजयकुमार चौरसियालाई ११ हजार ८९० मतमै चित्त बुझाउनु परेको थियो । कानुले चौरसियालाई १८ हजार ८५० मतको अन्तरले पराजित गर्दै पर्सा निर्वाचन क्षेत्र नं. २ मा आफ्नो स्थान सुरक्षित गर्नुभएको हो ।
स्थानीय तहमा जनप्रतिनिधिका रूपमा रहँदा कानुले नागरिकका दैनिक समस्या, कृषि, शिक्षा, स्वास्थ्य क्षेत्रका समस्या एवं प्रशासनिक झन्झट, समाजमा रहेका असमानता र अवसरको अभावलाई नजिकबाट नियाल्ने अवसर पाएको बताउनुभयो । उहाँले अब स्थानीय तहमा होइन नीतिगत तहमा पुगेर संरचनागत सुधार गर्नु पर्छ भन्ने सोच राखी प्रतिनिधि सभाको निर्वाचन लडेर जितेको बताउनुभयो । सांसद कानुले आफू जनताका माझमा रहेर जनताका सुखदुःखमा साथ दिने प्रतिबद्धता व्यक्त गर्नुभयो ।
जनताका माझमा रहेमा उनीहरूको आवश्यकता बुझिने र जनउत्तरदायी भएर काम गर्न सकिने उहाँको भनाइ छ । सांसद कानुले भन्नुभयो, “आफ्ना जनप्रतिनिधि साथमा भएपछि जनताले धेरै गुनासो गर्ने ठाउँ नै रहँदैन र जनताका समस्या सबै अवगत पनि भइहाल्छ ।”
गोरखापत्रसँगको कुराकानीमा उहाँले विधिको शासन स्थापित गर्न, जनतालाई सेवा प्रवाहमा भेदभाव नगर्न, उद्योग, कलकारखाना सञ्चालन गराउन, सुशासन कायम राख्न र समग्र राष्ट्रको हितका लागि आफूले सदनमा सकारात्मक भूमिका निर्वाह गर्ने बताउनुभयो । सुशासन र भ्रष्टाचार अन्त्यका लागि राज्य संयन्त्रलाई जनताप्रति उत्तरदायी बनाउनुपर्ने आवश्यकता औँल्याउदै कानुनी राज्यको स्थापना गर्न आफ्नो दृढ अठोट रहेको कानुले बताउनुभयो ।
उहाँले गरिबी अन्त्यका लागि कृषि नीति बदल्दै मल, बिउ र बजारीकरणमा ध्यान दिएर कृषि क्षेत्रलाई बलियो बनाउन सकिने भन्दै यसतर्फ आफ्नो विशेष ध्यान रहने बताउनुभयो । पर्सा क्षेत्र नम्बर २ को महानगरपालिकामा पर्ने क्षेत्र सुगम नै भए पनि बहुदरमाई र पर्सागढी नगरपालिका अन्तर्गतका गाउँटोलमा सडक पूर्वाधारको अवस्था ज्यादै नाजुक रहेको भन्दै त्यसको सुधारका लागि स्थानीय तहसँग समन्वय गरी काम गर्ने उहाँको भनाइ छ । एकटाङ्गामा एउटा पुल २० औँ वर्षदेखि निमार्णाधीन अवस्थामा रहेको, पर्सागढीको झब्राहगाउँमा अहिले पनि इन्टरनेट नचल्ने समस्या समाधानको पहल गर्ने उहाँले बताउनुभयो । उहाँले आफू विकासनिर्माण तथा समग्र नीति निर्माणको काममा सव्रिmय रहने बताउनुभयो ।
वीरगन्ज–१० मा रहेको आदर्श सेकेन्डरी स्कुलबाट पठनपाठन सुरु गरी त्रिजुद्ध स्कुलमा ८ कक्षासम्म, त्यसपछि पन्नालाल माविबाट एसएलसी पास गरेका कानुले वीरगन्जकै ठाकुरराम क्याम्पसबाट व्यवस्थापन सङ्कायमा प्रवीणता प्रमाणपत्र तह उत्तीर्ण गर्नुभएको छ । आफ्नै वडाको घडीअर्वा स्पोटर््स क्लबबाट सामाजिक सेवाको यात्रा प्रारम्भ गरेका कानु पछि मात्रै राजनीतिमा आउनुभएको हो । गोरखापत्र अनलाइन
