वीरगञ्ज । हनुमान जन्मोत्सव को पावन अवसरमा वीरगञ्ज मा भव्य तथा ऐतिहासिक शोभा यात्रा सम्पन्न भएको छ। विश्व हिन्दू परिषद् नेपाल वीरगञ्जको आयोजनामा हरेक वर्षझैँ यस वर्ष पनि आकर्षक रूपमा शोभा यात्रा निकालिएको हो।
दिउँसो २ बजे घण्टाघरबाट सुरु भएको यात्रा माईस्थान मन्दिर, हनुमान मन्दिर, विर्तामाई मन्दिर, छप्कैया छठघाट, रेल्वे रोड, अमर चौक, पञ्चमुखी हनुमान मन्दिर, रामटोल तथा गहवा हुँदै पुनः घण्टाघरमै पुगेर समापन गरिएको थियो।
शोभा यात्रामा वीरगञ्ज महानगरपालिकाका विभिन्न वडाबाट बाजागाजा, झाँकी तथा सांस्कृतिक टोलीहरूको उल्लेखनीय सहभागिता रहेको थियो। कार्यक्रमलाई सभ्य, मर्यादित र व्यवस्थित बनाउन करिब २ हजार स्वयंसेवक परिचालन गरिएको आयोजकले जनाएको छ।
सुरक्षा व्यवस्थापनका लागि वीरगञ्ज महानगरपालिका, जिल्ला प्रशासन कार्यालय, नेपाल प्रहरी तथा सशस्त्र प्रहरी बल लगायत सुरक्षा निकायहरूले विशेष सतर्कता अपनाएका थिए।
पर्सा जिल्लाभरका विभिन्न हिन्दू संघसंस्था, क्लब तथा धार्मिक संस्थाहरूले पनि आ–आफ्नो क्षेत्रमा शोभा यात्रा निकाल्दै उत्सव मनाएका थिए। गर्मी मौसमलाई मध्यनजर गर्दै यात्राका विभिन्न स्थानहरूमा खानेपानी, जुस, सरबत तथा बिस्कुट वितरणको व्यवस्था गरिएको थियो।
समग्रमा, यस वर्षको हनुमान जन्मोत्सव वीरगञ्जमा भव्य, शान्तिपूर्ण र उत्साहपूर्ण वातावरणमा सम्पन्न भएको छ।
