पर्सामा पत्रकारहरूको छलफलः सरकारी सूचना सम्बन्धी परिपत्रको विरोध, निर्णय फिर्ता लिन माग

समाचार

Home
समाचार
पर्सामा पत्रकारहरूको छलफलः सरकारी सूचना सम्बन्धी परिपत्रको विरोध, निर्णय फिर्ता लिन माग

पर्सामा पत्रकारहरूको छलफलः सरकारी सूचना सम्बन्धी परिपत्रको विरोध, निर्णय फिर्ता लिन माग

वीरगञ्ज । सरकारी सूचना प्रवाहसँग सम्बन्धित हालै जारी गरिएको परिपत्रप्रति आपत्ति जनाउँदै पर्साका पत्रकारहरूले संयुक्त छलफल गरेका छन्। सञ्चारकर्मीहरूले उक्त परिपत्रले प्रेस स्वतन्त्रता संकुचित गर्ने, सूचनामा पहुँच सीमित गर्ने तथा पत्रकारितामाथि नियन्त्रण बढाउने आशंका व्यक्त गरेका छन्।

नेपाल पत्रकार महासंघ पर्साको सभाहलमा आयोजित छलफल कार्यक्रममा विभिन्न सञ्चार माध्यममा आबद्ध पत्रकारहरूले सरकारको निर्णयप्रति गम्भीर असहमति जनाउँदै तत्काल परिपत्र फिर्ता लिन माग गरेका हुन्। सहभागीहरूले संविधानले सुनिश्चित गरेको अभिव्यक्ति स्वतन्त्रता र सूचनाको हकलाई कुण्ठित गर्ने कुनै पनि कदम स्वीकार्य नहुने स्पष्ट पारे।

छलफलका क्रममा वक्ताहरूले भने, “सरकारले सूचना प्रवाहलाई व्यवस्थित गर्ने नाममा पत्रकारितामाथि अंकुश लगाउने प्रयास गरेको देखिन्छ। यसले लोकतान्त्रिक मूल्य–मान्यतामाथि गम्भीर प्रहार गर्नेछ।”
कार्यक्रमबाट पत्रकारहरूले संयुक्त रूपमा सरकारलाई परिपत्र तत्काल फिर्ता लिन आग्रह गर्दै अन्यथा चरणबद्ध आन्दोलनमा उत्रिने चेतावनीसमेत दिएका छन्। साथै, सञ्चारसम्बन्धी नीतिगत निर्णय गर्दा सरोकारवाला पक्षसँग पर्याप्त परामर्श गर्नुपर्ने मागसमेत राखिएको छ।

पत्रकारहरूले प्रेस स्वतन्त्रताको संरक्षणका लागि एकजुट भएर अघि बढ्ने प्रतिबद्धता जनाएका छन्। नेपाल पत्रकार महासंघ पर्साका अध्यक्ष ओमप्रकाश खनालको अध्यक्षतामा सम्पन्न कार्यक्रममा महासंघ मधेश प्रदेशका सचिव दिपक गौतम, प्रेस चौतारीका केन्द्रीय सदस्य विजय भण्डारी, प्रेस सेन्टर मधेश प्रदेशका अध्यक्ष निरज पिठाकोटे मगर, पर्सा शाखाका सह–सचिव अजय चौरसिया, पुर्व उपाध्यक्ष युवराज खडका, बरिष्ठ पत्रकार शेसमन पडित लगायतको उपस्थिति रहेको थियो । कार्यक्रमको सञ्चालन महासंघ पर्साका सचिव विजय चौहानले गरेका थिए।

प्रकाशित मिति: बिहीबार, चैत २६, २०८२ २१:०२

प्रतिक्रिया दिनुहोस्