जनकपुरधाम । मधेश प्रदेशका मुख्यमन्त्री कृष्णप्रसाद यादव विश्वासको मत लिन हच्किएका छन् । सत्ता गठबन्धनभित्रै असन्तुष्टि बढ्दै जाँदा केही सांसदले फ्लोर क्रस गर्न सक्ने संकेत देखिएपछि उनले विश्वासको मत लिने प्रक्रिया तत्कालका लागि टारेका हुन् ।
विश्वासको मतका लागि आज प्रदेशसभा बैठक बोलाइएको भए पनि अन्तिम समयमा बैठक स्थगित गरिएको छ । सत्ता गठबन्धनभित्र सहमति नजुटेपछि बैठक आउँदो वैशाख ८ गतेका लागि सारिएको कांग्रेस नेताहरूले बताएका छन् ।
मुख्यमन्त्री यादव नेतृत्वको सरकार संकटमा पर्नुको मुख्य कारण सत्ता गठबन्धनको घटक जनमत पार्टीले समर्थन फिर्ता लिनु हो । जनमत सरकारबाट बाहिरिएपछि यादवले विश्वासको मत लिने तयारी गरेका थिए । यद्यपि त्यसपछि गठबन्धनका अन्य दलहरूले सरकारलाई समर्थन कायम रहेको संयुक्त विज्ञप्ति जारी गरेका थिए ।
तर, सत्ता समीकरण बाहिर देखिएजस्तो सहज छैन । जनमत पार्टीभित्रको आन्तरिक विवादले सरकारलाई प्रत्यक्ष असर गरेको छ । मन्त्री छनोटको विषयलाई लिएर पार्टीभित्र चर्किएको विवादले अन्ततः सरकारबाट बाहिरिने अवस्था सिर्जना भएको नेताहरू बताउँछन् ।
जनमतभित्र संसदीय दलका नेता महेश यादव र प्रमुख सचेतक चन्दन सिंहबीच लामो समयदेखि मतभेद रहँदै आएको थियो । पछिल्लो निर्णयमा पनि यही आन्तरिक शक्ति संघर्ष निर्णायक बनेको बताइन्छ ।
उता, नेपाली कांग्रेसभित्र पनि मुख्यमन्त्री यादवप्रति असन्तुष्टि बढ्दो छ । केही सांसदहरू सुरुदेखि नै यादवको कार्यशैलीप्रति असन्तुष्ट रहेको स्रोत बताउँछ । त्यसबाहेक जनता समाजवादी पार्टी (जसपा) ले पनि सुरुदेखि नै मुख्यमन्त्रीमा दाबी गर्दै आएको थियो । एमालेविरुद्ध गठबन्धन निर्माणका क्रममा कांग्रेसलाई साथ दिए पनि जसपा अझै नेतृत्व परिवर्तनको प्रतीक्षामा रहेको बताइन्छ ।
यही कारण मुख्यमन्त्री यादव अहिले दोहोरो दबाबमा परेका छन् । सत्ता जोगाउने चुनौती एकातिर छ भने गठबन्धनभित्रकै अविश्वास अर्को चुनौती बनेको छ ।
यता, नेकपा (एकीकृत समाजवादी) भित्र पनि संसदीय दलको नेतृत्वलाई लिएर लामो समयदेखि विवाद जारी छ । आन्तरिक खटपटकै कारण केही समयअघि संसदीय दलका नेता भरत साहले राजीनामा दिनुपरेको थियो । गठबन्धनभित्रको यही अस्थिरताले मधेश सरकारको भविष्य थप अनिश्चित बन्दै गएको छ । नेपाललिड
