मकवानपुरका चरेससहित वीरगंजका चौधरी भारतीय सुरक्षाकर्मीद्वारा पक्राउ

समाचार

Home
समाचार
मकवानपुरका चरेससहित वीरगंजका चौधरी भारतीय सुरक्षाकर्मीद्वारा पक्राउ

मकवानपुरका चरेससहित वीरगंजका चौधरी भारतीय सुरक्षाकर्मीद्वारा पक्राउ

वीरगंज । वीरगन्ज–रक्सौल सीमास्थित मितेरी पुलबाट ११ किलोभन्दा बढी लागूऔषध चरेससहित एक नेपाली नागरिकलाई भारतीय सुरक्षाकर्मीले पक्राउ गरेको छ । पक्राउ पर्नेमा वीरगन्ज महानगरपालिका–छपकैयाका ३९ वर्षीय अमर चौधरी रहेका छन्।

नेपालबाट भारततर्फ ठूलो परिमाणमा चरेस तस्करी हुन लागेको विशेष सुचनाका आधारमा एसडीपीओ मनिष कुमार आनन्दको नेतृत्वमा भारतीय प्रहरी र सशस्त्र सीमा बल (एसएसबी) को संयुक्त टोलीले शनिबार साँझ टोली परिचालन गरेको थियो। वीरगन्जबाट रक्सौलतर्फ जाँदै गरेको शंकास्पद ई–रिक्सालाई रोकेर खानतलासी गर्दा बोराभित्र २२ वटा कालो प्लास्टिकमा प्याक गरिएको कुल ११ किलो २४६ ग्राम चरेस फेला परेको हो।

बरामद चरेस र ई–रिक्सासहित पक्राउ परेका चौधरीलाई थप अनुसन्धान तथा कानुनी कारबाहीका लागि रक्सौलस्थित हरैया थानामा बुझाइएको एसएसबीले जनाएको छ। प्रारम्भिक अनुसन्धान अनुसार उक्त चरेस मकवानपुरका विभिन्न भेगबाट सङ्कलन गरी बारा र पर्सा हुँदै भारत पु¥याउने योजना रहेको खुलेको छ।

नेपाली सीमा क्षेत्रका सुरक्षा टोली र चेकजाँचलाई छलेर यति ठूलो परिमाणको लागूऔषध नाकासम्म पुग्नुले नेपालतर्फको सुरक्षा व्यवस्थामाथि समेत गम्भीर प्रश्न खडा गरेको छ।

प्रकाशित मिति: आइतबार, असोज १८, २०८३ १६:०५

प्रतिक्रिया दिनुहोस्