वीरगन्ज । पर्साको पकहा मैनपुर गाउँपालिका–४ लहावरथकरीमा मदिरा सेवन तथा बिक्री–वितरणको विषयलाई लिएर दुई पक्षबीच भएको विवाद झडपमा परिणत हुँदा आठ जना घाइते भएको स्थानीयले बताएका छन्। स्थानीयका अनुसार विवाद बढ्दै गएपछि दुवै पक्षबीच कुटपिट भएको थियो। घटनामा दुई जनाको टाउकोमा चोट लागेको र अन्य केही व्यक्तिसमेत घाइते भएको बताइएको छ। घाइतेहरूको अवस्थाबारे भने आधिकारिक स्वास्थ्य विवरण सार्वजनिक भएको छैन।
स्थानीय माधव राउत यादवका अनुसार उनका भतिजा अशोक यादवले कमल राउत यादवको किराना पसलमा मदिरा सेवन गरेका थिए। माधवको दाबीअनुसार अशोक दिउँसो करिब २ बजेसम्म मदिरा सेवन गरेपछि बेहोसजस्तो अवस्थामा पुगेका थिए।
अशोकलाई घरतर्फ लैजाने क्रममा आफूले मदिरा सेवन नगर्न र यस्ता गतिविधिबाट टाढा रहन सम्झाएको माधवको भनाइ छ। सोही क्रममा किराना पसलमा मदिरा सेवन तथा बिक्री–वितरण गरिएको विषयमा प्रश्न उठेपछि विवाद सुरु भएको उनले बताएका छन्।
‘अनुमति बिना मदिरा बिक्री भइरहेको छ’ भन्ने आरोप
माधव राउत यादवले उक्त किराना पसलबाट मदिरा बिक्री–वितरण भइरहेको तर त्यसका लागि आवश्यक अनुमति वा इजाजतपत्र भएरनभएकोबारे प्रश्न उठाएका छन्। उनका अनुसार गाउँमा खुलेआम मदिरा बिक्री तथा सेवन बढ्दा युवाहरूमा यसको असर पर्न सक्ने र सामाजिक समस्या बढ्न सक्ने जोखिम छ।
यता, नेपालमा मदिराको उत्पादन तथा बिक्री–वितरणका लागि सम्बन्धित अनुमतिपत्र आवश्यक पर्ने कानुनी व्यवस्था छ। मदिरा ऐन, २०३१ अनुसार अनुमतिपत्रबिना मदिरा बिक्री–वितरण गर्न वा मदिरा सेवन गराउने बार, रेस्टुरेन्ट वा पसल सञ्चालन गर्न नपाइने व्यवस्था छ। आन्तरिक राजस्व विभागका अनुसार मदिराको उत्पादन, बिक्री, वितरण, खरिद, बिक्री, ओसारपसार तथा भण्डारणसम्बन्धी कारोबार सुरु गर्नुअघि आवश्यक अन्तःशुल्क इजाजतपत्र लिनुपर्ने व्यवस्था छ।
-1789626905.jpeg)
