गहवामाईको चुनरी यात्रा यस वर्ष पनि निकालिने, ५ देखि ७ हजार भक्तजन सहभागी हुने अनुमान

समाचार

Home
समाचार
गहवामाईको चुनरी यात्रा यस वर्ष पनि निकालिने, ५ देखि ७ हजार भक्तजन सहभागी हुने अनुमान

गहवामाईको चुनरी यात्रा यस वर्ष पनि निकालिने, ५ देखि ७ हजार भक्तजन सहभागी हुने अनुमान

वीरगञ्ज । वीरगञ्जको धार्मिक तथा सांस्कृतिक पहिचानसँग जोडिएको गहवामाई मन्दिरमा यस वर्ष पनि परम्परागत चुनरी यात्रा निकालिने भएको छ। चुनरी यात्रा प्रत्येक वर्षझैँ यस वर्ष पनि भव्य रूपमा यँहि असोज २५ गते घटस्थापनाको दिन आयोजना गर्ने तयारी भइरहेको आयोजक समितिले जनाएको छ।

आयोजक समितिले मंगलबार पत्रकार सम्मेलनमार्फत चुनरी यात्राको तयारीबारे जानकारी दिँदै यात्रामा करिब ५ हजारदेखि ७ हजारसम्म भक्तजन सहभागी हुने अनुमान गरेको जनाएको हो। गहवामाई मन्दिरमा श्रद्धालुहरूले धार्मिक आस्था र विश्वासका साथ पूजा–आराधना गर्दै चुनरी चढाउने परम्परा रहँदै आएको छ। यही धार्मिक परम्परालाई निरन्तरता दिँदै चुनरी यात्रालाई व्यवस्थित र भव्य बनाउने तयारी गरिएको आयोजक समितिको भनाइ छ।

पत्रकार सम्मेलनमा आयोजकहरूले चुनरी यात्रामा सहभागी हुने भक्तजनको संख्या यस वर्ष उल्लेख्य रूपमा बढ्न सक्ने अनुमान गरेका छन्। वीरगञ्ज तथा आसपासका क्षेत्रका साथै पर्सा र सीमावर्ती भारतीय क्षेत्रबाट समेत श्रद्धालुहरू सहभागी हुने अपेक्षा गरिएको समितिले जनाएको छ।

ठूलो संख्यामा भक्तजन सहभागी हुने भएकाले यात्रा व्यवस्थापन, सुरक्षा, खानेपानी, स्वास्थ्य तथा यातायात व्यवस्थापनलाई प्राथमिकतामा राख्नुपर्ने देखिएको छ। आयोजक समितिले सम्बन्धित निकायसँग समन्वय गरी यात्रालाई सुरक्षित र व्यवस्थित बनाउने तयारी भइरहेको जनाएको छ।

गहवामाई मन्दिर वीरगञ्जको धार्मिक पर्यटन तथा सांस्कृतिक पहिचानसँग समेत जोडिएको महत्वपूर्ण धार्मिक स्थलका रूपमा परिचित छ। यहाँ विभिन्न पर्व तथा विशेष धार्मिक अवसरमा ठूलो संख्यामा श्रद्धालुहरू आउने गरेका छन्। आयोजक समितिले श्रद्धालुहरूलाई धार्मिक तथा सांस्कृतिक मर्यादा कायम गर्दै चुनरी यात्रामा सहभागी हुन आग्रह गरेको छ।

प्रकाशित मिति: मंगलबार, असोज २०, २०८३ २२:०६

प्रतिक्रिया दिनुहोस्