वीरगंज । बिन्दवासिनी गाउँपालिका वडा न. ३ मा रहेको श्री नेपाल स्काउट निम्न माध्यमिक विद्यालय ठूलो इटियाहीमा शैक्षिक सत्र २०८० को अन्तिम परीक्षाको नतिजा प्रकाशन तथा पुरस्कार वितरण कार्यक्रम बुधवार सम्पन्न भएको छ ।
विद्यालय ब्यवस्थापन समितीका अध्यक्ष मुकेश कुमार चौरसियाको अध्यक्षतामा सम्पन्न अन्तिम परिक्षाको नतिजा प्रकाशन तथा पुरस्कार वितरण कार्यक्रममा बाल विकास देखि कक्षा ८ सम्म प्रथम, दोस्रो र तेस्रो स्थान हासिल गर्न सफल भएका विद्यार्थीहरुलाई अबिरको टिका लगाई पुरस्कार वितरण गरिएको थियो ।
सो कार्यक्रममा विद्यालयमा अध्ययनरत विद्यार्थीहरु मध्ये नियमित उपस्थिति, अनुशासन (बानी ब्यहोरा रहन सहन) दक्षता तथा अन्य क्रियाकलापहरुको मूल्याकंंन गरि हरेक कक्षाबाट एक जना छात्र र एक जना छात्रा गरि जम्मा १६ जना विद्यार्थीहरुलाई पुरस्कार वितरण गरिएको हो । विद्यालयमै सर्वोत्कृष्ट स्थान हासिल गरेका छात्र सिद्धार्थ कुमार चौरसिया र छात्रा राजनन्दनी कुमारी चौरसियालाई समेत पुरस्कृत गरिएको थियो ।
सो कार्यक्रममा प्रमुख अतिथि बिन्दवासिनी गा.पा की उपाध्यक्ष ज्योति चौरसियाले विद्यार्थीहरुलाई लगनशील भई पढने प्रेरणा दिदै उनीहरुको उतरोत्तर प्रगतिको शुभकामना दिएकी थिइन् ।
कार्यक्रमको अध्यक्षता गर्दै व्यवस्थापन समितिका अध्यक्ष चौरसियाले पुरस्कृत हुने सम्पूर्ण विद्यार्थीहरुलाई बधाई दिदै नयाँ शैक्षिक सत्र २०८१ देखि संस्कार सहितको शिक्षा अभियान चलाउने बताए । स्कूलले हरेक महिनाको अन्तिम साता परीक्षा लिने, कम्प्यूटर कक्षा सञ्चालन गर्ने, खेलकुद प्रतियोगिता गराउने र सुरक्षाको दृष्टिकोणले सिसिटिभी क्यामरा जडान गर्ने तयारी भईरहेको समेत अध्यक्ष चौरसियाले बताए ।
विद्यार्थीहरुको विद्यालय प्रतिको आकर्षण बढाउने उदेश्यले यो कार्यक्रम गरिएको विद्यालयका प्रधानाध्यापक प्रमोद प्रसाद चौरसियाले बताए ।
सो कार्यक्रममा विद्यालय ब्यवस्थापन समितिका सदस्यहरु, शिक्षक, शिक्षिका, कर्मचारी, शिक्षा प्रेमी, अभिभावक, पत्रकार तथा विद्यार्थीहरुको उल्लेखनिय सहभागिता रहेको थियो । विद्यालयले पहिलो पटक प्रथम, द्वितिय, तृतिय र स्कूल मै सर्वोत्कृष्ट अंक ल्याउने विद्यार्थीहरुलाई सम्मान गरेको जनाईएको छ । सो कार्यक्रमको सहजिकरण विद्यालयका शिक्षक राकेश चौरसियाले गरेका थिए ।
