वीरगञ्ज । जलवायु परिवर्तनको प्रतिकूल असरले तराई–मधेस क्षेत्रमा गहिरिँदो खानेपानी अभावलाई मध्यनजर गर्दै खानेपानीमन्त्री प्रदीप यादव र कानुन, न्याय तथा संसदीय मामिलामन्त्री अजयकुमार चौरसियाले आज पर्सा जिल्लाका विभिन्न स्थान एवं वडाहरूमा विशेष अनुगमन तथा निरीक्षण गर्नुभएको छ ।
तराई–मधेस क्षेत्र विशेष गरी वीरगञ्ज महानगरपालिकामा जलवायु परिवर्तनका प्रतिकूल प्रभावका कारण खानेपानीको अभाव गम्भीर बन्दै गएपछि त्यसको तत्कालिन तथा दीर्घकालिन रुपमा समस्या समाधानका लागि खानेपानीमन्त्री तथा कानुनमन्त्री चौरसियाले अनुगमन सहित निरीक्षण गर्नु भएको मन्त्री यादवका स्वकीय अधिकृत हरिन्द्र साह कानुले जानकारी दिनुभयो ।
उहाँका अनुसार तराई–मधेस सहित वीरगञ्ज क्षेत्रका नागरिकले खानेपानी आपूर्तिमा कठिनाइ भोग्नुपरेकाले समस्या पहिचान र समाधानका लागि मन्त्रीद्धयले आज पर्सा जिल्ला निर्वाचन क्षेत्र नं २ का विभिन्न गाउँ, टोल तथा वडाहरूमा अनुगमन गर्नु भएको हो ।
अनुगमनका क्रममा मन्त्री यादवले वीरगञ्ज लगायत तराई–मधेसको खानेपानीको तत्काल एवं दीर्घकालिन समस्या समाधानका लागि आफु सहित सिङ्गो मन्त्रालयको टिम अहोरात्र खटिएको जानकारी दिनुभयो ।
उहाँले भन्नुभयो, “वीरगञ्ज महानगरपालिकाको खानेपानीको दीर्घकालिन समस्या समाधानका लागि एडिबिको ऋण सहयोगमा रु ४ अर्ब ५० करोड छुट्याइएको छ । तत्काल खानेपानीको समस्या समाधानका लागि यहाँका विभिन्न स्थानहरूमा डिपबोरिङ जडान गरी खानेपानी वितरणको कार्य आरम्भ गरिसकेको छ ।”
धेरै स्थानहरूमा नागरिकले खानेपानी आपूर्तिमा कठिनाइ भोग्नुपरेकाले समस्या पहिचान र समाधानका लागि आफु सहित कानुनमन्त्री चौरसिया पर्सा जिल्ला निर्वाचन क्षेत्र नं २ का विभिन्न गाउँ, टोल तथा वडाहरूमा अनुगमनका लागि आइपुगेको मन्त्री यादवले बताउनुभयो ।
तराई–मधेस सहित वीरगञ्ज क्षेत्रमा देखिएको खानेपानीको समस्या समाधानका लागि आफु पूर्ण प्रतिबद्ध र कटिबद्ध रहेको मन्त्री यादवले बताउनुभयो ।
उहाँले भन्नुभयो, “नेपाल खानेपानी संस्थानले सरोकारवाला निकायहरूसँग सहकार्य गर्दै समस्याको समाधानका लागि आवश्यक कदम चालिरहेको छ । यस कार्यमा तपाईंहरू सबैको सहकार्य र सहयोग अपेक्षित छ ।”
सोही क्रममा कानुनमन्त्री चौरसियाले पर्सा जिल्लावासीको खानेपानीको गम्भीर समस्याप्रति गहिरो चासो व्यक्त गर्नु हुँदै खानेपानी पहुँचलाई सर्वसुलभ बनाउने प्रतिबद्धता जनाउनुभयो ।
उहाँले भन्नुभयो, “वीरगञ्ज महानगरपालिकालगायत पर्सा जिल्लामा पछिल्लो समय जनताले पानीका लागि चरम समस्या भोगिरहेकाले समस्या पहिचान गर्दै तत्काल तथा दीर्घकालिन समाधानका उपाय अवलम्बन गर्न हामी अनुगमनमा निस्किएका छौँ । समस्या समाधान गर्छौँ ।”
