आँखा शिविरमा निःशुल्क उपचार, मोतिविन्दूका बिरामीको शल्यक्रिया गरिने

स्वास्थ्य

Home
स्वास्थ्य
आँखा शिविरमा निःशुल्क उपचार, मोतिविन्दूका बिरामीको शल्यक्रिया गरिने

आँखा शिविरमा निःशुल्क उपचार, मोतिविन्दूका बिरामीको शल्यक्रिया गरिने

काठमाडौं । बुढानीलकण्ठ अस्पताल ले तिलगंगा आँखा प्रतिष्ठान सँगको सहकार्यमा आयोजना गरेको दुईदिने बृहत आँखा शिविरमा सर्वसाधारणलाई निःशुल्क आँखा परीक्षण, औषधि तथा चस्मा वितरण गरिएको छ। शिविरमा मोतिविन्दू भएका बिरामीको पहिचान गरी निःशुल्क शल्यक्रिया गर्ने तयारी समेत गरिएको अस्पतालले जनाएको छ।
बुढानीलकण्ठ नगर अस्पताल परिसरमा सञ्चालन भइरहेको शिविरमा स्थानीयवासीको उल्लेखनीय सहभागिता रहेको छ। शिविरमार्फत आँखासम्बन्धी विभिन्न समस्याको परीक्षणसँगै आवश्यक उपचार सेवा प्रदान गरिएको अस्पताल प्रशासनले जनाएको छ।

कार्यक्रममा बोल्दै बुढानीलकण्ठ नगरपालिकाका प्रमुख मिठाराम अधिकारीले नागरिकको स्वास्थ्य पहुँच विस्तार गर्ने उद्देश्यले यस्ता स्वास्थ्य शिविर सञ्चालन गरिएको बताए। उनले आँखाको समस्या समयमै पहिचान हुन नसके दैनिक जीवन नै प्रभावित हुने भएकाले शिविर प्रभावकारी हुने विश्वास व्यक्त गरे।

नगरपालिका वडा नम्बर १२ का वडा अध्यक्ष शम्भु भट्टराईले नगरपालिकाले स्वास्थ्य क्षेत्रलाई प्राथमिकतामा राख्दै विभिन्न सेवा सञ्चालन गरिरहेको उल्लेख गर्दै आँखा शिविरले विशेषगरी ज्येष्ठ नागरिकलाई लाभ पुग्ने बताए।

अस्पतालका प्रमुख कार्यकारी अधिकृत गोपालप्रसाद पोखरेलका अनुसार शिविरमा सहभागी बिरामीमध्ये मोतिविन्दू देखिएका व्यक्तिको आगामी जेठ १३ गते निःशुल्क शल्यक्रिया गरिनेछ। उनले पछिल्लो समय उमेरसँगै आँखासम्बन्धी समस्या बढ्दै गएको भन्दै समय–समयमा आँखाको परीक्षण गर्न आग्रह गरे।

त्यस्तै, तिलगंगा आँखा प्रतिष्ठानका बाह्य आँखा कार्यक्रम अधिकृत महेश पराजुलीले ४० वर्षमाथिका व्यक्तिले नियमित आँखा परीक्षण गर्नुपर्ने सुझाव दिए। उनले मधुमेह र उच्च रक्तचापका बिरामीले हरेक वर्ष अनिवार्य रूपमा आँखा जाँच गराउनुपर्ने बताए।

प्रकाशित मिति: बुधबार, जेठ ६, २०८३ २२:०७

प्रतिक्रिया दिनुहोस्