मधेश प्रदेशमा पुरानै गठबन्धन कायम: कांग्रेस-एमाले-नेकपाबीच सहकार्य जारी राख्ने सहमति

समाचार

Home
समाचार
मधेश प्रदेशमा पुरानै गठबन्धन कायम: कांग्रेस-एमाले-नेकपाबीच सहकार्य जारी राख्ने सहमति

मधेश प्रदेशमा पुरानै गठबन्धन कायम: कांग्रेस-एमाले-नेकपाबीच सहकार्य जारी राख्ने सहमति

मधेश प्रदेशमा नेपाली कांग्रेस, नेपाल कम्युनिष्ट पार्टी (एमाले) र नेपाली कम्युनिष्ट पार्टी (नेकपा)को गठबन्धन सरकारलाई निरन्तरता दिने सहमति भएको छ । गठबन्धनमा एमाले संसदीय दलका नेता सरोजकुमार यादव र नेकपाका संसदीय दलका नेता तथा अर्थमन्त्री युवराज भट्टराई सहभागी थिए ।

बैठकपछि सञ्चारकर्मीसँग कुरा गर्दै अर्थमन्त्री भट्टराईले अन्य प्रदेशमा कांग्रेस–एमालेबीचको राजनीतिक सहकार्य अन्त्य भए पनि मधेशमा भने वर्तमान राजनीतिक समीकरणलाई निरन्तरता दिने सहमति भएको जानकारी दिए ।

उनले प्रदेशको राजनीतिक स्थायित्वलाई ध्यानमा राख्दै तीन दलबीचको सहकार्यलाई कायम राख्ने निर्णय भएको बताए । एमाले संसदीय दलका नेता सरोजकुमार यादवले तीन दलको सत्प्रयासबाट प्रदेशको बजेट पारित भएको उल्लेख गर्दै आगामी दिनमा पनि सहकार्यलाई निरन्तरता दिइने बताए।

उनले अन्य प्रदेशको राजनीतिक समीकरणभन्दा मधेस प्रदेशको अवस्था फरक रहेको उल्लेख गर्दै स्थायित्व, समृद्धि र विकासलाई केन्द्रमा राखेर तीन दल एकताबद्ध भएर अघि बढ्ने निर्णय गरिएको जानकारी दिए। कांग्रेसका संसदीय दलका नेता तथा मुख्यमन्त्री कृष्णप्रसाद यादवले यहाँको राजनीतिक अवस्था फरक रहेकाले वर्तमान राजनीतिक समीकरणलाई कायम राख्ने सहमति भएको बताए ।

प्रकाशित मिति: शुक्रबार, साउन १, २०८३ ०८:२९

प्रतिक्रिया दिनुहोस्