वडासदस्यको नियन्त्रणबाट तीन सय बोरा डिएपी मल बरामद

समाचार

Home
समाचार
वडासदस्यको नियन्त्रणबाट तीन सय बोरा डिएपी मल बरामद

वडासदस्यको नियन्त्रणबाट तीन सय बोरा डिएपी मल बरामद

ढल्केबर । धान रोपाइँको मुख्य समयमा किसानले मल अभाव झेलिरहेका बेला धनुषाको धनुषाधाम नगरपालिका–५ नौसय बिघाका वडासदस्य सुरेश साहले लुकाइछिपाइ राखेको अवस्थामा तीन सयभन्दा बढी बोरा डिएपी मल प्रहरीले नियन्त्रणमा लिएको छ।

मलको स्रोत नभेटिएपछि शनिबार नौसय बिघास्थित प्रहरी चौकीले सो मल नियन्त्रणमा लिएको हो। प्रहरी चौकीका इन्चार्ज अजय झाले वडासदस्य साहले शुक्रबार मध्यराति दुई वटा टेम्पोमा मल लोड गरी अन्त लैजान लागेको अवस्थामा स्थानीयको सहयोगमा नियन्त्रणमा लिइएको बताउनुभयो।

त्यस सम्बन्धमा थप अनुसन्धान गर्दै जाँदा बाहिरबाट ताल्चा लगाएर बन्द गरिएको गोदामबाट तीन सयभन्दा बढी बोरा डिएपी मल बरामद भएको उहाँले जानकारी दिनुभयो।

बरामद गरिएको मलको यकिन सङ्ख्या र त्यसको स्रोतबारे थप अनुसन्धान भइरहेको बताउँदै इन्चार्ज झाले बरामद मल इलाका प्रहरी कार्यालय धनुषाधाम पठाइएको बताउनुभयो। उहाँका अनुसार धनुषाधाम नगरपालिका–५ का वडाध्यक्ष इन्दल महतो सञ्चालक रहेको पर्वता कृषि सहकारी संस्थाको दैनिक कारोबार वडासदस्य साहले गर्दै आएको प्रारम्भिक अनुसन्धानबाट खुलेको छ। हाल वडासदस्य साह फरार रहेकाले खोजी भइरहेको प्रहरी इन्चार्ज झाको भनाइ छ।

स्थानीयवासी गोविन्द यादवले कृत्रिम अभाव सिर्जना गरेर महँगो मूल्यमा बेच्नका लागि वडासदस्य साहले मल लुकाएर राखेको आरोप लगाउनुभयो। सहकारीमा किसान मल लिन जाँदा वडासदस्यले सकिएको भन्दै फर्काउने गरेको उहाँले जानकारी दिनुभयो। किसानले मल अभाव झेलिरहेका बेला यसरी मल लुकाउने जनप्रतिनिधिलाई कडा कारबाही हुनुपर्ने उहाँको भनाइ छ।

प्रकाशित मिति: शनिबार, साउन ९, २०८३ १८:५३

प्रतिक्रिया दिनुहोस्