वीरगञ्ज। नारायणी अस्पतालमा शनिबार आकस्मिक कक्षमा उपचार प्रक्रियालाई लिएर भएको घटनापछि अस्पताल प्रशासनले पाँच जना स्वास्थ्यकर्मीलाई छानबिन प्रतिवेदन नआएसम्मका लागि जिम्मेवारीबाट अलग राख्ने निर्णय गरेको छ।
निलम्बनमा पर्ने स्वास्थ्यकर्मीमा डा. प्रमोद राम, डा. रामकिशोर सिंह, प्रह्लाद प्रसाद, नरेशकुमार चौधरी र आस्था यादव रहेका छन्। अस्पतालको आकस्मिक बैठकले उनीहरूलाई अनुसन्धान निष्पक्ष बनाउन अस्थायी रूपमा जिम्मेवारीबाट अलग राख्ने निर्णय गरेको जनाएको छ।
अस्पताल स्रोतका अनुसार घटनाको सत्यतथ्य पत्ता लगाउन ७ दिनभित्र प्रतिवेदन बुझाउने कार्यादेशसहित छानबिन समिति गठन गरिएको छ। समितिले घटनाका सबै पक्ष, उपचार प्रक्रिया, ड्युटीमा रहेका स्वास्थ्यकर्मीको भूमिका तथा अस्पतालको सेवा प्रवाहबारे विस्तृत अध्ययन गरी प्रतिवेदन पेश गर्नेछ।
शनिबार भएको घटनामा बिरामी राजकुमार पटेलको मृत्यु भएपछि अस्पताल परिसर तनावग्रस्त बनेको थियो। मृतकका आफन्तले उपचारमा ढिलासुस्ती तथा लापरवाही भएको आरोप लगाउँदै विरोध जनाएका थिए। घटनापछि अस्पताल प्रशासन, स्थानीय प्रशासन तथा सुरक्षा निकाय सक्रिय बनेका थिए।
बैठकले मृतक राजकुमार पटेलप्रति श्रद्धाञ्जली व्यक्त गर्दै शोकसन्तप्त परिवारप्रति गहिरो समवेदना प्रकट गरेको छ। साथै परिवारलाई आवश्यक सहजीकरण गर्ने र घटनाबारे निष्पक्ष अनुसन्धान हुने प्रतिबद्धता जनाएको छ।
अस्पताल प्रशासनले छानबिन प्रतिवेदनका आधारमा आवश्यक कानुनी तथा प्रशासनिक निर्णय गरिने स्पष्ट पारेको छ। साथै आकस्मिकसहित सम्पूर्ण स्वास्थ्य सेवा नियमित, प्रभावकारी र अविच्छिन्न रूपमा सञ्चालन गरिने प्रतिबद्धता दोहोर्याएको छ।
यस घटनाले सरकारी अस्पतालमा आकस्मिक सेवाको गुणस्तर, बिरामी व्यवस्थापन, चिकित्सक–सेवाग्राही सम्बन्ध तथा उत्तरदायित्वबारे पुनः गम्भीर बहस सुरु गराएको छ। छानबिन समितिको प्रतिवेदनले घटनाको वास्तविक कारण, जिम्मेवारी निर्धारण तथा भविष्यमा यस्ता घटना दोहोरिन नदिन आवश्यक सुधारका उपायहरू सिफारिस गर्ने अपेक्षा गरिएको छ।
