काठमाडौं । सशस्त्र प्रहरी बल (एपीएफ) को इन्टेलिजेन्स ब्युरोले काठमाडौं उपत्यकामा सञ्चालन हुँदै आएको लागूऔषध कारोबारविरुद्ध ठूलो कारबाही गर्दै एक लाख २० हजार ट्रामाडोल क्याप्सुलसहित तीन जनालाई पक्राउ गरेको छ।
एपीएफ इन्टेलिजेन्स ब्युरोका अनुसार डीआईजी दिपेन्द्र शाहको नेतृत्वमा लागूऔषध नियन्त्रण अभियानलाई तीव्र बनाइएको क्रममा विशेष सूचनाका आधारमा काठमाडौं महानगरपालिका–१४, गाङखेल क्षेत्रमा सञ्चालन गरिएको अपरेसनबाट उक्त सफलता हात परेको हो।
ब्युरोका सप्रनाउ सुवर्ण थापा र सप्रनि रबिन्द्र भट्टको कमाण्डमा खटिएको टोलीले मिति २०८३ साउन १२ गते साँझ ७:२० बजे तीन जनालाई नियन्त्रणमा लिएको जनाएको छ। पक्राउ पर्नेमा भारतको बिहार राज्य, मोतिहारी निवासी २६ वर्षीय राकेश कुमार शाह, बारा जिल्लाको कलैया–५ निवासी २१ वर्षीय नौसाद अन्सारी तथा ओखलढुंगाको मानेभञ्ज्याङ–५ स्थायी घर भई हाल ललितपुर महानगरपालिका–६ मा बसोबास गर्दै आएका २४ वर्षीय दीपक राई रहेका छन्।
कारबाहीका क्रममा प्रहरीले १२ हजार फायल बराबर एक लाख २० हजार ट्रामाडोल क्याप्सुल बरामद गरेको जनाएको छ। त्यससँगै बा.च.क. ७०१७ नम्बरको टाटा कम्पनीको सवारी साधन, बागमती प्रदेश १–०२०६५ प ४४८९ नम्बरको ट्रायम्फ बुलेट मोटरसाइकल, तीन थान एन्ड्रोइड मोबाइल, नगद रु. १,७४५, एक थान सवारी चालक अनुमति पत्र (लाइसेन्स) र एक थान सवारीको बिलबुक समेत बरामद गरिएको एपीएफले जनाएको छ।
प्रारम्भिक अनुसन्धानका क्रममा पक्राउ परेका व्यक्तिहरू लामो समयदेखि काठमाडौं उपत्यकामा लागूऔषध ओसारपसार तथा बिक्री–वितरणमा संलग्न रहेको आशंका गरिएको एपीएफको दाबी छ। पक्राउ परेका तीनै जनालाई थप अनुसन्धान तथा कानुनी कारबाहीका लागि नेपाल प्रहरीलाई बुझाउने प्रक्रिया अघि बढाइएको छ।
एपीएफ इन्टेलिजेन्स ब्युरोले पछिल्लो एक महिनाभित्र लागूऔषध कारोबारविरुद्ध दोस्रो ठूलो कारबाही गर्न सफल भएको जनाएको छ। सुरक्षा निकायले यस्ता अभियानलाई निरन्तरता दिँदै लागूऔषधको अवैध कारोबारमा संलग्न सञ्जालमाथि थप अनुसन्धान भइरहेको जनाएको छ।
