काठमाडौँ । खानेपानी मन्त्री प्रदीप यादवले घाटामा रहेर सेवा दिँदै आएका नेपाल खानेपानी संस्थानका देश भरीका शाखाहरुलाई नाफामै ल्याएर छोडिने बताउनु भएको छ । संस्थानलाई अब नाफामा ल्याउन गेम चेन्जर प्लान (खेल परिवर्तक योजना) ल्याउने प्रतिबद्धता समेत व्यक्त गर्नुभएको छ ।
नेपाल खानेपानी संस्थानको ३६औँ स्थापना दिवसको अवसरमा आयोजित कार्यक्रममा बोल्दै मन्त्री यादवले संस्थानले लाखौँ नेपाली नागरिकलाई शुद्ध खानेपानी उपलब्ध गराउँदै आएको भन्दै यसको महत्वलाई उच्च मूल्याङ्कन गर्नुभयो । उहाँले संस्थानलाई घाटाबाट नाफामा रूपान्तरण गर्न सबै कर्मचारी र सरोकारवालाहरूको पूर्ण सहयोग आवश्यक रहेको बताउनुभयो ।
मन्त्री यादवले संस्थानलाई घाटाबाट मुक्त गर्न सबै कर्मचारीले गम्भीर भएर सोच्नुपर्ने र योजनाबद्ध रूपमा अघि बढ्नुपर्नेमा जोड दिनुभयो । उहाँले भन्नुभयो, “संस्थान कस्को कारण घाटामा पुग्यो ? यसलाई नाफामा ल्याउने उपाय के हुन् ? सबैले जिम्मेवारीपूर्वक सोच्नुपर्छ । संस्थान रहे मात्र हामी सबैलाई फाइदा हुन्छ, घाटामा गएर नै संस्थान बन्द भयो भने दोेष कसलाई दिने ?”
मन्त्री यादवले पाइपलाइन फुट्ने, चुहिने, फोहर तथा ढल मिसिएर पानी आउने समस्या तत्काल समाधान गर्नुपर्नेमा विशेष ध्यानाकर्षण गराउनुभयो । उहाँले कर्मचारीहरूलाई निर्देशन दिँदै भन्नुभयो, “खानेपानी सेवामा कुनै लापरबाही हुनुहुँदैन । नागरिकलाई शुद्ध, सुरक्षित र गुणस्तरीय पानी उपलब्ध गराउने हाम्रो दायित्व हो । संस्थानलाई नाफामा ल्याएरै छोड्छौँ ।”
नाफामा रहेका अन्य शाखाहरुबाट सबैले पाठ सिक्नु पर्ने उहाँको भनाई छ । संस्थानमा महाप्रवन्धकको दश महिनादेखि स्थायी नेतृत्वको अभाव रहेको भन्दै उहाँले निकै अप्ठेरो परिस्थितीका बाबजुद् आफ्नो कार्यकालमा बल्लतल्ल महाप्रवन्धक नियुक्त गर्न सफल भएको बताउनुभयो । साथै, उहाँले कर्मचारीको हकहितका सहयोग गर्नका लागि संस्थानको नयाँ विनियमावली चाँडै कार्यान्वयनमा ल्याइने आश्वासन दिँदै भन्नुभयो, “संस्थानका कर्मचारीहरुको हहितका लागि नयाँ विनियमावली आउँदै छ । आएको दिन तपाईंहरू दिपावली मनाउनुहुनेछ ।” हाल २२ वटा शाखा कार्यालयमार्फत १५ लाख जनसंख्यालाई सुरक्षित र स्वच्छ खानेपानी आपूर्ति गरिरहेको जानकारी दिँदै मन्त्री यादवले सेवा थप विस्तार गर्दै लैजानुपर्ने आवश्यकता औँल्याउनुभयो ।
सरकारको नीति अनुरूप “एक घर–एक धारा” कार्यक्रम प्रभावकारी रूपमा कार्यान्वयन गर्नुपर्ने उहाँको भनाइ छ । संस्थानको आगामी त्रिवर्षीय योजनाअनुसार ६० हजार नयाँ घरधुरीलाई धारा वितरण गरी ७ करोड ४० लाख लिटर पानी आपूर्ति गर्ने लक्ष्य राखिएको छ । यस योजनालाई प्रभावकारी रूपमा कार्यान्वयन गर्न सरकार पूर्ण रूपमा प्रतिबद्ध रहेको उहाँले बताउनुभयो ।
काठमाडौँ उपत्यका बाहिरका शहरी क्षेत्रमा सहज, सुरक्षित र पर्याप्त खानेपानी वितरणको जिम्मेवारी बोकेको संस्थानले अब स्थानीय तहहरूसँग अझ बलियो सहकार्य गर्ने विश्वास व्यक्त गर्दै मन्त्री यादवले भन्नुभयो, “संस्थानलाई अझ सबल बनाउने मेरो व्यक्तिगत तथा मन्त्रालयको तर्फबाट आवश्यक सम्पूर्ण सहयोग रहनेछ ।” संस्थानले खानेपानी सेवामा पारदर्शिता, पहुँच र गुणस्तर कायम राख्दै नागरिकको विश्वास जित्नुपर्ने मन्त्री यादवको भनाइ छ । उहाँले दिगो विकास र समृद्धिको लक्ष्य प्राप्त गर्न संस्थानको योगदान अत्यन्तै महत्त्वपूर्ण हुने स्पष्ट पार्नुभयो ।
-1740657482.jpeg)
यसैगरी उहाँले झुम्सा र कोलपाटन खानेपानीको समस्या चाडै समाधान हुने विश्वास दिलानुभयो । उहाँले भन्नुभयो, “झम्सा र कोलपाटन खानेपानीको समस्या बुझनका लागि म आफै त्यहाँ पुगेको छु । ढुक्क हुनुस् त्यहाँको समस्या चाडै समाधान हुन्छ ।”
समारोहको सफलताको शुभकामना व्यक्त गर्दै मन्त्री यादवले सम्पूर्ण संस्थान परिवारलाई अझ सबल, सक्षम र नागरिकमुखी सेवाप्रदायक संस्थाका रूपमा अघि बढ्न प्रेरणा दिनुभएको छ । सोही कार्यक्रमलाई सम्बोधन गर्दै मन्त्रालयका सचिव ई प्रमिलादेब शाक्य बज्राचार्यले संस्थानले अबका दिनमा आफुलाई नाफा मुखी बनाउनेमा आफु बिश्वस्त रहेको बताउनुभयो । उहाँले भन्नुभयो, “संस्थानलाई आवश्यक सहयोग गर्न मन्त्रालय सदैभ तयार छ । अबका दिनमा संस्थानले आफ्नो क्षमताको विकास गर्दै आफुलाई नमुना संस्थानका रुपमा प्रस्तुत गर्ने छ मैले बिश्वास लिएको छु ।”
संस्थानको ३६ औँ स्थापना दिवसको अवसरमा अध्यक्ष गुणाकरण भुसालले आगामी दिनहरुमा नेपाल खानेपानी संस्थानलाई थप विकसित र प्रभाबकारी बनाई निरन्तर सेवा प्रदायिक एवम नाफा मुखी बनाइने प्रतिद्धता व्यक्त गर्नुभयो । सो कार्यक्रममा संस्थानका महाप्रवन्धक अर्जनबाबु ढकाल, निमित्त महाप्रवन्धक त्रिदेव श्रेष्ठ लगायतका कर्मचारीहरुको सहभागिता रहेको थियो ।
