रुसले अतिक्रमण गरेको युक्रेनमा युद्ध अपराध भएको आशङ्कामा अनुसन्धान गर्न अन्तर्राष्ट्रिय पहलहरू बढ्दो क्रममा रहेको देखिएको छ।
दुई फोरेन्सिक विज्ञसहित ४२ जना अनुसन्धानकर्तालाई युक्रेनतर्फ पठाइएको अन्तर्राष्ट्रिय फौजदारी अदालत आईसीसीले जनाएको छ।
आईसीसीका प्रमुख अभियोजनकर्ता करिम खानका अनुसार अनुसन्धानका लागि आईसीसीले कुनै ठाउँमा यति ठूलो टोली पठाएको यो पहिलो पटक हो।
युक्रेनमा युद्ध अपराध भएका सम्भावित स्थानबारे गत महिनादेखि अध्ययन गरिरहेका फ्रेन्च अनुसन्धानकर्ताहरूसँग आईसीसीको टोलीले सहकार्य गर्नेछ।
बढ्दो दबाव
युद्ध अपराधको विषयलाई लिएर अर्कोतर्फ संयुक्त राज्य अमेरिकाले पनि दबाव बढाइरहेको देखिएको छ।
अमेरिकी विदेश मन्त्रालयले रुसी फौजबाट भएका ज्यादतीका घटनाबारे तथ्य सङ्कलन तथा विश्लेषण गर्नका लागि एउटा नयाँ कार्यक्रम घोषणा गरेको छ।
अमेरिकी राष्ट्रपति जो बाइडनले मस्कोलाई जबाफदेही बनाइ छोड्ने वाचा गरेका छन्।
रुसी फौजको बमबारीका कारण आफ्ना दशौँ हजार सर्वसाधारण मारिएको र शहरका सडकहरूमा शवहरू अलपत्र परिरहेको युक्रेनले बताउने गरेको छ।
तर युद्धका क्रममा सर्वसाधारण नागरिकलाई निशाना बनाएको कुरा रुसले निरन्तर अस्वीकार गर्दै आएको छ।
यसैबीच, घेराबन्दीमा रहेको युक्रेनको बन्दरगाह शहर मारिऊपोलस्थित एजोभस्टाल स्टील कारखानाबाट उद्धार गरिएको थप युक्रेनी सैनिकलाई रुस नियन्त्रित क्षेत्रमा रहेको एउटा बन्दीकेन्द्रमा लगिएको छ।
तस्बिर स्रोत,REUTERS
रुसी फौजको सुरक्षामा उनीहरूलाई समूहमा बन्दीकेन्द्र लगिएको विवरणमा जनाइएको छ।
मङ्गलवार थप कति जना युक्रेनी सैनिकको उद्धार गरिएको हो भन्नेबारे चाहिँ स्पष्ट पारिएको छैन।
यसअघि सोमवार सोही स्टील कारखानाबाट २६४ जना युक्रेनी सैनिकलाई उद्धार गरिएको थियो।
मस्कोले त्यसलाई युक्रेनी फौजको आत्मसमर्पणको रूपमा व्याख्या गरिरहेको छ।
युक्रेनी अधिकारीहरूले नियन्त्रणमा लिइएका सैनिक साटासाट सम्झौता अन्तर्गत उनीहरूलाई स्वदेश फर्काइने बताएका छन्।
रुसको विरोध रुसकै टेलिभिजनमा
रणनीतिक रूपमा महत्त्वपूर्ण स्थानमा रहेको मारिऊपोलमाथि रुसी फौजहरूले अतिक्रमणको सुरुदेखि नै भीषण बमबारी गर्दै आएका छन्।
मारिऊपोलमाथि रुसले कब्जा गर्नुको अर्थ क्राइमिया र डोन्बासबीच उसले सेतु पाउनु हो।
र, त्यसो भए युक्रेनको ब्ल्याक सी तटीय क्षेत्रका ८० प्रतिशतभन्दा बढी भूभागमा मस्कोको नियन्त्रण हुनेछ । बीबीसी नेपालीबाट सभार
