वीरगञ्ज । विश्व हिन्दू परिषद् नेपाल वीरगञ्जद्वारा प्रत्येक वर्षझैँ यस वर्ष पनि श्री हनुमान जन्मोत्सवको पावन अवसरमा भव्य शोभा यात्रा आयोजना गरिने भएको छ। हिन्दू पत्रकार संघ नेपालको आयोजनामा शुक्रबार बीरगंज स्थित माइस्थान अतिथि सदनमा पत्रकार सम्मेलनको आयोजना गरी परिषद्का सचिव दिपेन्द्र सराफ्ले शनिबार दिउसो २ बजे देखि शोभा यात्रा निस्किने जानकारी दिए।उक्त धार्मिक कार्यक्रमलाई विगतका वर्षभन्दा अझ व्यवस्थित र भव्य बनाउने तयारी गरेको सराफ्ले जानकारी दिए।
कार्यक्रमअनुसार शोभा यात्रा वीरगञ्जको घण्टाघरबाट दिउँसो २ बजे सुरु हुनेछ। यात्रा माईस्थान मन्दिर, हनुमान मन्दिर, विर्तामाई मन्दिर, छप्कैया छठघाट, रेल्वे रोड, अमर चौक, पञ्चमुखी हनुमान मन्दिर, रामटोल, गहवा हुँदै पुनः घण्टाघरसम्म पुगेर समापन गरिनेछ। यस ऐतिहासिक धार्मिक यात्रामा वीरगञ्ज महानगरपालिकाका हरेक वडाबाट सहभागीता रहने र करिब ३० हजारभन्दा बढी भक्तजन सहभागी हुने अनुमान गरिएको छ। कार्यक्रमलाई सभ्य र मर्यादित बनाउन करिब २ हजार स्वयंसेवक परिचालन गरिने परिषद्ले जनाएको छ।
शोभा यात्रालाई सुरक्षित र व्यवस्थित बनाउन वीरगञ्ज महानगरपालिका, जिल्ला प्रशासन कार्यालय तथा सुरक्षा निकायहरूसँग आवश्यक समन्वय गरिसकिएको छ। साथै जिल्लामा रहेका विभिन्न हिन्दू संघसंस्था तथा धार्मिक संस्थाहरूको समेत सहकार्य रहने बताइएको छ। गर्मी मौसमलाई मध्यनजर गर्दै यात्राका विभिन्न स्थानमा खानेपानीको व्यवस्था गरिनेछ, जसले सहभागी भक्तजनलाई सहजता प्रदान गर्ने अपेक्षा गरिएको छ।
परिषद्का सचिव दीपेन्द्र सरार्फले यस पावन अवसरमा आयोजना हुने कार्यक्रमलाई व्यापक रूपमा प्रचारप्रसार गरी आम नागरिकसम्म जानकारी पुर्याउन सञ्चारमाध्यमसँग सहयोगको अपेक्षा व्यक्त गरेका छन्। कार्यक्रम हिन्दू पत्रकार सङ्घ नेपालका अध्यक्ष राजन रोनियारको अध्यक्षतामा सम्पन्न भएको थियो भने सहजीकरण सचिव राज सराफले गरेका थिए।
