काठमाडौँ । प्रधानमन्त्री वालेन्द्र शाहले नेपाली सेनाका अधिकृत क्याडेटहरूलाई कर्तव्यनिष्ठ, अनुशासित र जिम्मेवार भएर राष्ट्र सेवामा समर्पित हुन आग्रह गर्नुभएको छ ।
भक्तपुरको खरिपाटीस्थित नेपाली सैनिक प्रतिष्ठानमा आज आयोजित अधिकृत क्याडेट तालिमको आयुक्त पद प्रदान कवाज समारोहलाई सम्बोधन गर्दै प्रधानमन्त्री शाहले मातृभूमि र जनताप्रति समर्पित हुने दृढ सङ्कल्प बोकेर करिब ३६ महिनाको अनवरत कठिन परिश्रम पछि नेपाली सेनामा अधिकृत क्याडेटबाट अधिकृतको रूपमा आयुक्त पद प्राप्त गरेकोमा र त्रिभुवन विश्वविद्यालयबाट स्नातक तहको अध्ययन पूरा गरी दीक्षित भएकोमा बधाई दिनुभयो ।
प्रधानमन्त्री शाहले कमाण्डरका रुपमा विभिन्न क्षेत्रका फरक–फरक सामाजिक पृष्ठभूमिका जवानहरूको नेतृत्व गर्दै बलियो, एकीकृत र सक्षम टिम निर्माण गर्न अधिकृत क्याडेटहरु सफल हुने विश्वास व्यक्त गर्नुभयो ।
दीक्षित अधिकृत क्याडेटहरु आफ्नो सैनिक जिम्मेवारी, आचरण, चेन अफ कमाण्ड र अनुशासनलाई हृदयङ्गम गर्दै आफ्नो दायित्वप्रति सदैव सजग र कर्तव्यनिष्ठ रहनेमा आफू विश्वस्त रहेको प्रधानमन्त्री शाहले बताउनुभयो ।
प्रधानमन्त्री शाहले नेपाली सेनाका उत्कृष्ट अधिकृत क्याडेटहरुलाई पुरस्कृत गर्नुभयो । त्यस अवसरमा प्रधान सेनापति अशोक राज सिग्देलले केन्या र जाम्बियाबाट तालिममा सहभागी ३ जना शिक्षार्थी अधिकृत क्याडेटहरुलाई नेपाली मिलिटरी एकेडेमी मेडालियन प्रदान गर्नुभयो ।
कार्यक्रममा सि.सं ६३ अधिकृत क्याडेट, सि.सं ५ स्नातक अधिकृत क्याडेट र सि.सं ५३ पदिक तथा बिल्लादार अधिकृत आधार तालिममा सहभागी १ सय ८३ अधिकृत क्याडेटहरुले आयुक्त पद प्रदान कबाज प्रदर्शन गरेका थिए ।
प्रतिष्ठानबाट हालसम्म ६ हजार ७ सय ४३ अधिकृत क्याडेट र १ हजार ६ सय ८ जना प्राविधिक अधिकृत र ३२ विदेशी शिक्षार्थीले तालिम लिएको नेपाली सेनाले जनाएको छ ।
