नेपाली सिपाही गिनिज बुकमा पाँचौंपटक नाम लेखाउन सफल

समाचार

Home
समाचार
नेपाली सिपाही गिनिज बुकमा पाँचौंपटक नाम लेखाउन सफल

नेपाली सिपाही गिनिज बुकमा पाँचौंपटक नाम लेखाउन सफल

काठमाडौँ । नेपाली सेनाका सिपाही हरिचन्द्र गिरी पाँचौंपटक गिनिज बुक अफ वर्ल्ड रेकर्डमा नाम लेखाउन सफल भएका छन् । यसअघि विभिन्न चार वटा विधामा विश्व कीर्तिमान राखिसकेका उनले ‘मस्ट स्किप्स् अन एन अप्राइट टायर इन वान मीनेट’ विधामा विश्व रेकर्ड बनाएका हुन् ।

उनले गुड्ने अवस्थामा रहेको टायरमाथि एक मीनेटमा १२० पटक ‘स्किपिङ’ खेलेर विश्वलाई नै चकित बनाएका छन् । यस विधामा विश्व कीर्तिमान राखेर उक्त बुकमा नाम लेखाउने उनी पहिलो व्यक्ति हुन् । उनले सर्वप्रथम हातले टेकेर भर्याङको ५० खुड्किला १२ मीनेट ६५ सेकेण्डमा पूरा गर्दै बुकमा नाम लेखाएका थिए ।

स्विजरल्याण्डको केभिन डेलकोको नाममा रहेको सो रेकर्डलाई आफ्नो नाममा गर्दै गिनिज वर्ल्ड रेकर्डको यात्रा शुरु गरेका उनी त्यतिमै रोकिएनन् । मुलुकलाई विश्वमाझ चिनाउने हुटहुटी भएका उनले सन् २०२२, मे ४ मा अर्को रेकर्ड आफ्नो नाममा गरे ।

उनले आफ्नो खुट्टाको बीचमा फुटबल राखी हातले टेकेर सबैभन्दा छिटो ५० मीटर हिँड्ने नयाँ कीर्तिमान बनाए । झाङ सुआङको २६ मीनेट ९ सेकेण्डको कीर्तिमानलाई केही सेकेण्डले पछि पार्दै २५ मीनेट ५८ सेकेण्डमा रेकर्ड बनाए ।

त्यसलगत्तै आफ्नो खुट्टाबीच फुटबलको साथ हातमा सबैभन्दा छिटो १० मीटर हिँड्ने कीर्तिमान पनि बनाए । जुन ४ मीनेट ४९ सेकेण्डमा पूरा गरेका थिए । तीन वटा रेकर्ड कायम गरेपछि पनि अर्को रेकर्डको भोका रहेका गिरीले केबल २५ मीनेट ३ सेकेण्डमा हातमा ७५ वटा खुड्किला झरेर चौंथो रेकर्ड कायम गरेका हुन् । साभार : जन आस्था