सर्लाही । सर्लाहीमा विद्यालयको पहुँचमा पुग्न नसकेका २० जना अपाङ्ग बालबालिकालाई घरमै शिक्षा प्रदान हुने भएको छ। सर्लाहीको हरिपुर, ईश्वरपुर, गोडैता र बलरा नगरपालिकामा बहुअपांगता भएका बालबालिकाहरूलाई शिक्षाको अधिकार सुनिश्चित गर्नका लागि साक्षरता सहजकर्तालाई घरमै पठाएर शिक्षा प्रदान गरिने छ । सेभ द चिल्ड्रेनको आर्थिक सहयोग र ग्रामीण नारी उत्थान संघ हरिपुर तथा राष्ट्रिय रोजगार प्रवर्द्धन केन्द्र मलंगवामा संयुक्त रूपमा सञ्चालित समुन्नति परियोजना अन्तर्गत बहुअपांगता भई विद्यालयको पहुँचमा जान नसक्ने बालबालिकाहरूलाई घरमै शिक्षा प्रदान गरिने छ ।
ग्रामीण नारी उत्थान संघका कार्यक्षेत्र पर्ने हरिपुर नगरपालिकाका ३ जना र ईश्वरपुर नगरपालिकाका ७ जना र राष्ट्रिय रोजगार प्रवर्द्धन केन्द्रका कार्यक्षेत्र पर्ने बलरा र गोडैता नगरपालिका गरी १० जना अपाङ्ग बालबालिकालाई घरमै शिक्षा प्रदान गरिने ग्रामीण नारी उत्थान संघका उपाध्यक्ष विष्णुप्रसाद चालिसेले बताउनु भयो ।
बहुअपांगता भई विद्यालयको पहुँचमा जान नसक्ने बालबालिकाहरूलाई घरमै शिक्षामा पहुँच पुर्याउने उद्देश्यले शारीरिक अपाङ्गता, दृश्यसम्बन्धी अपाङ्गता, सुनाइ सम्बन्धि अपाङ्गता, श्रवणदृष्टिविहिन अपाङ्गता, स्वर र बोलाई सम्बन्धि अपाङ्गता, मानसिक वा मनोसामाजिक अपाङ्गता र बौद्धिक अपाङ्गता भएका बालबालिकाहरूलाई समेत नेपाल सरकारको संविधानमा आधारभूत शिक्षा अनिवार्य भएता पनि अझै विद्यालय वा कुनै श्रोत विद्यालयहरूमा हाल सम्म भर्ना हुन नसकेको अवस्थामा सर्लाहीमा प्रथम पटक यो अभ्यास गरिएको छ ।
हरिपुरका ३ जना र ईश्वरपुरका ७ जना तथा गोडैता र बलराका १० जना साक्षरता सहजकर्तालाई घरमै विद्यालय सञ्चालन सम्बन्धि ५ दिने तालिम सर्लाही नयाँ रोडको सीता प्यालेसमा तालिम प्रदान गरिसकेको छ । अब बालबालिकाहरूको घरमै विद्यालय गई नेपाल सरकारको एकिकृत पाठ्यक्रममा आधारित कक्षा १ देखि ३ सम्मको पाठ्यक्रमको आधारमा घरमै विद्यालय सञ्चालन गरेर बहु अपाङ्गता भएका बालबालिकाले सजिलै सिक्न अपाङ्गता मैत्री वातावरणमा कक्षा सञ्चालन गरि बालबालिकाको शिक्षामा पहुँच बढाउने ग्रामीण नारी उत्थान संघका उपाध्यक्ष चालिसेले बताउनु भयो । सहजकर्ताहरूले ३ वर्ष सम्म निरन्तर पढाउने तथा ३ कक्षा पूर्ण भएपछि पछि ती बालबालिकालाई अपाङ्गमैत्री विद्यालयमा जोडिने छ ।
तालिमको सहजिकरण सेभ द चिल्ड्रेन बर्दिबासबाट राम बहादुर साह र रुवाका शम्भु साह तेलि र राम विश्वास चौधरी त्यस्तै आर आर पिकेका चन्द्रशेखर सहनी र महेश कुमार मण्डलले सहजिकरण गर्नु भएको थियो । कार्यक्रम सञ्चालनको क्रममा हरिपुर नगरपालिकाका शिक्षा प्रमुख नागेश्वर राय द्वारा अनुगमन समेत गरिएको थियो । सो कार्यक्रममा रुवा बाट १० जना र आर आर पिके बाट १० जना गरि जम्मा २० जना सहजकर्ता सहभागिता भएको थियो । तालिमको समापन ग्रामीण नारी उत्थान संघ हरिपुरका अध्यक्ष गोमा देवी न्यौपानेले गर्नुभयो ।
