बारा — बाराको सिम्रौनगढ नगरपालिका–८ कचोर्वा गाउँमा पानीको अभावमा धानको बिउ ब्याडमै सुक्न थालेको छ । अन्न भण्डारको रुपमा रहेको मधेसमा हिउँददेखि अहिलेसम्म पानी परेको छैन ।
असार बितिसक्दा समेत पानी नपरेपछि रोपाइँ हुन सकेको छैन । जिल्लामा सिँचाइ सुविधा नभएको ठाउँको खेत सुकेको छ । धानको ब्याड घामको रापले डढेको छ । ट्युबेलको पानी समेत सुकेको छ । पानीको सतह घटेपछि डिप ट्यूबेल तथा चापाकलमा पानी आउन छाडेको छ । ‘बाँच्ने आधार पानी पिउनेदेखि अन्न उत्पादनको लागि सिँचाइ पनि छैन ।
ब्याड खेतमै सुक्यो,’ सिम्रौनगढ ८ कचोर्वाका नकछेद यादवले भने, ‘कसरी बाँच्ने ?’ सर्वसाधारणले पिउने पानीको समस्या टार्न ठाउँ ठाउँमा सार्वजनिक स्थलमा गाडिएको डिप ट्युबेलको पानी भर्न लाम लाग्नु परिरहेको छ । एउटै ट्युबेलमा आलोपालो पिउने पानी र सिँचाइका लागि खेतमा पानी लगाइरहेको छ । मधेस सरकारले प्रदेशका ८ जिल्लालाई सुक्खा तथा संकटकालीन क्षेत्र घोषणा गरिसकेको छ ।
उता पर्सा जिल्लामा पिउने पानीको समस्या टार्न प्रदेश सरकारले वीरगन्जसहित पर्सा जिल्लाका लागि ८ वटा दमकल नेपाली सेनालाई वितरण गरेको छ । पानीको स्रोत रहेको चुरे क्षेत्रमा अनियन्त्रित बालुवागिट्टी दोहन र जंगल मास्नाले खोला खोल्सी, पैनीमा पानी छैन । पैनीसमेत अतिक्रमणमा परेको छ । स्थानीय तहले आफ्नो आम्दानी बढाउन चुरे क्षेत्रको खोला बालुवा गिट्टीका लागि ठेक्का दिँदा त्यहाँ अनियन्त्रित र जथाभावी कटान गर्दा पानीको मुहान सुक्ने अवस्थामा पुगेका हुन् ।
जिल्ला प्रशासन कार्यालय बाराले गत सोमबार पानीको स्रोत र वितरण प्रणालीबारे पालिकाका जनप्रतिनिधिसहित सरोकारवाला सबैलाई बैठक डाकेर सर्वपक्षीय छलफल गर्दै पालिकालाई पानीको स्रोत जुटाउन सिँचाइ व्यवस्थापनका लागि दबाब दिएको छ । सहायक प्रमुख जिल्ला अधिकारी छविरमण भट्टराईका अनुसार पालिकाहरुले सिँचाइसहित पिउने पानीको व्यवस्थापन गर्नका लागि स्रोत जुटाउन पर्याप्त बजेट छुट्याउन नसकिरहेको अवस्थामा सरोकारवालासित यस्तो छलफल गरिएको हो ।
विद्युत् आपूर्ति नियमित नहुँदा र भोल्टेजको समस्या भएपछि त्यसको विकल्पमा ट्युबेलबाट पानी तान्न बजारमा पम्पीसेटको बिक्री बढेको छ । उता ट्युबेल गाड्न पाइपको पनि बिक्री बढेको छ । साभार : इकान्तिपुर
