वीरगञ्ज । जनमत पार्टीको दोस्रो महाधिवेशन नजिकिँदै गर्दा केन्द्रीय कार्यकारिणी समिति सदस्य पदका लागि उम्मेदवारी घोषणा गर्ने क्रम सुरु भएको छ। यसैक्रममा ई. राजुराज गिरीले विद्यार्थी, युवा तथा ‘जेनजी’ प्रतिनिधित्वको दाबी गर्दै केन्द्रीय कार्यकारिणी समिति सदस्य पदमा आफ्नो उम्मेदवारी घोषणा गरेका छन्।
गिरीले सामाजिक सञ्जालमार्फत आफ्नो उम्मेदवारी घोषणा गर्दै महाधिवेशनलाई भव्य र सफल बनाउन पार्टीका नेता–कार्यकर्ता तथा समर्थकलाई सहभागी हुन आह्वान गरेका छन्। जनमत पार्टीको आधिकारिक महाधिवेशन निर्देशिकाअनुसार पार्टीको दोस्रो महाधिवेशन २०८३ असोज ९ र १० गते पर्साको वीरगञ्जमा आयोजना हुँदैछ। निर्देशिकामा असोज १० गते महाधिवेशन तथा मतदान र असोज ११ गते मतगणना तथा परिणाम घोषणा गर्ने कार्यतालिका उल्लेख छ।
महाधिवेशनबाट केन्द्रीय कार्यकारिणी समितिका पदाधिकारी तथा सदस्य चयन हुनेछन्। पार्टीको निर्देशिकाअनुसार केन्द्रीय कार्यकारिणी समिति बढीमा १५१ सदस्यीय हुनेछ। त्यसमध्ये महाधिवेशनबाट १०० जना पदाधिकारी तथा सदस्य निर्वाचित गर्ने र बाँकी ५१ स्थान क्षेत्रीय, लैंगिक, उमेर समूह तथा सामाजिक विविधतालाई ध्यानमा राखेर मनोनयन गर्ने व्यवस्था गरिएको छ। ४० वर्षमुनिका युवाको प्रतिनिधित्व एकतिहाइ तथा महिलाको प्रतिनिधित्व पनि एकतिहाइ पुग्ने व्यवस्था निर्देशिकामा उल्लेख छ।
केन्द्रीय कार्यकारिणी समिति सदस्य पदमा उम्मेदवारी दिन पार्टीको विधानले निश्चित योग्यता तोकेको छ। जिल्ला वा अन्य केन्द्रीय निकायको कार्यकारिणी समितिको पदाधिकारी, वा सम्बन्धित संरचनामा तोकिएको जिम्मेवारीमा रहेको अथवा केन्द्रीय समिति, विशेष समिति, राष्ट्रिय परिषद् वा प्रदेश समितिको सदस्यका रूपमा एक कार्यकाल पूरा गरेको हुनुपर्ने व्यवस्था निर्देशिकामा उल्लेख छ। गिरी जनमत पार्टी पर्सा क्षेत्र नम्बर ३ सँग सम्बन्धित रहेको पार्टीको वेबसाइटमा प्रकाशित विवरणबाट देखिन्छ। पार्टीको सम्पर्क विवरणमा उनलाई पर्सा क्षेत्र नम्बर ३ का रूपमा उल्लेख गरिएको छ।
यसअघि जनमत पार्टीले वीरगञ्जस्थित टाउन हलमा दोस्रो महाधिवेशन आयोजना गर्ने तयारी गरेको सार्वजनिक विवरणहरूमा पनि उल्लेख गरिएको छ। गिरीले आफ्नो उम्मेदवारी घोषणासँगै महाधिवेशनमा सहभागी भएर कार्यक्रमलाई सफल बनाउन पार्टीका नेता–कार्यकर्ता तथा शुभेच्छुकलाई आग्रह गरेका छन्।
जनमत पार्टीको दोस्रो महाधिवेशनले नयाँ केन्द्रीय कार्यकारिणी समिति चयन गर्नुका साथै राजनीतिक तथा आर्थिक प्रतिवेदन, विधान संशोधनलगायत विषयमा समेत निर्णय गर्ने कार्यतालिका छ।
