नारायणगढ-मुग्लिन सडकमा पहिरोमा परेर दुई यात्रुबस बगे, थप अर्को यात्रुबसमा ढुंगा लाग्दा चालकको निधन

समाचार

Home
समाचार
नारायणगढ-मुग्लिन सडकमा पहिरोमा परेर दुई यात्रुबस बगे, थप अर्को यात्रुबसमा ढुंगा लाग्दा चालकको निधन

नारायणगढ-मुग्लिन सडकमा पहिरोमा परेर दुई यात्रुबस बगे, थप अर्को यात्रुबसमा ढुंगा लाग्दा चालकको निधन

बिहीबार राति सिमलतालमा गएको पहिरो । तस्बिर : सडक डिभिजन, भरतपुर

चितवन । नारायणगढ मुग्लिन सडकको सिमलतालमा शुक्रबार बिहान साढे तीन बजे तिर पहिरोमा परेर दुईवटा यात्रुवाहक बस बगेको चितवन जिल्ला प्रहरी कार्यालयले जनाएको छ । त्यसैगरी सोही सडक खण्डको १७ किलोमा अर्को यात्रुबसमा पहिरोबाट झरेको ढुंगाले लागेर चालकको निधन भएको पनि प्रहरीले जनाएको छ ।

सिमलतालमा दुईवटा बस पहिरोमा बगेको भन्ने जानकारी आए पनि एउटा बसको केही भाग मात्र देखिएको चितवन जिल्ला प्रहरी कार्यालयका प्रवक्ता डीएसपी भेषराज रिजालले बताए । बस काठमाडौंबाट गौर जाँदै गरेको गणपति डिलक्स रहेको बसबाट हाम फालेका ३ यात्रुले बताएको डीएसपी रिजालले जानकारी दिए ।

चितवनका प्रमुख जिल्ला अधिकारी इन्द्रदेव यादवका अनुसार सिमलतालमा बगेका दुई बसमध्ये वीरगन्जबाट काठमाडौँ गइरहेको एन्जल बसमा २४ जना र काठमाडौंबाट गौर आइरहेको गणपति डिलक्समा ४१ जना यात्रु रहेका छन् ।

त्यसैगरी सोही सडक खण्डको १७ किलोमा बिहान साढे तीन बजे आसपासमा खसेको पहिरोबाट आएको ढुंगाले लागेर बसका चालकको निधन भएको छ । बुटवलबाट काठमाडौं जाँदै गरेको लु २ ख ६५६६ नम्बरको बसलाई ढुंगाले लाग्दा गम्भीर घाइते भएका चालक नवलपरासीका मेघनाथ विकको उपचारका क्रममा चितवन मेडिकल कलेजको शिक्षण अस्पतालमा निधन भएको डीएसपी रिजालले बताए ।

उद्धारका लागि नेपाल प्रहरी र सशस्त्र प्रहरीको टोली परिचालन भएको र थप विवरण आउन बाँकी रहेको चितवन प्रहरीका एसपी भावेश रिमालले बताए ।

प्रकाशित मिति: शुक्रबार, असार २८, २०८१ ०८:०१

प्रतिक्रिया दिनुहोस्